"Təhsil bir millətin ruhudur; onu yaşadanlar isə gələcəyi qurur".
30 oktyabr 2024-cü ildə Təhsil naziri Emin Əmrullayevin əmrilə Elçin Kərimov Gəncə-Daşkəsən Regional Təhsil İdarəsinə müdir təyin olundu. Bu təyinat bölgə təhsilində yeni bir mərhələnin başlanğıcı, yenilənmə və dirçəlişin simvolu oldu. Çünki bu tarix təkcə bir inzibati qərarın günü deyil, həm də təhsilin ruhuna yeni bir nəfəsin verildiyi, düşünən, axtaran, inanan bir rəhbərin meydan aldığı gündür. Elçin Kərimovun rəhbərliyi ilə bölgənin məktəblərində canlanma, dirçəliş və yenilənmə ruhu hiss olunur. O, hər bir məktəbin təkcə divarlarını deyil, orada oxuyan şagirdlərin düşüncələrini, arzularını və inamını dəyişməyə çalışır. Çünki o bilir ki, sabahı dəyişmək üçün bu gün bir uşağın qəlbindəki işığı yandırmaq kifayətdir. Gəncə-Daşkəsən Regional Təhsil İdarəsinin rəisi Elçin Kərimov müasir idarəçilik prinsiplərini təhsil sahəsinə gətirən, yenilikçi baxış bucağı ilə bölgə təhsilinin keyfiyyət göstəricilərini yüksəltməyə çalışan nüfuzlu bir rəhbər kimi tanınır. Onun fəaliyyəti dövründə təhsil müəssisələrində idarəetmənin səmərəliliyinin artırılması, müəllimlərin peşəkarlıq səviyyəsinin yüksəldilməsi və şagirdlərin bilik və bacarıqlarının inkişafına yönəlmiş sistemli islahatlar xüsusi diqqət mərkəzindədir. Elçin Kərimovun rəhbərliyi ilə Gəncə-Daşkəsən təhsil sistemində diaqnostik qiymətləndirmə, rəqəmsallaşma və şəffaf idarəçilik mexanizmlərinin tətbiqi, məktəblər arasında sağlam rəqabət mühitinin formalaşdırılması kimi yeniliklər həyata keçirilmişdir. O, təhsil müəssisələrinin maddi-texniki bazasının möhkəmləndirilməsinə, müəllimlərin fasiləsiz inkişaf proqramlarına cəlb olunmasına, eləcə də şagirdlərin elmi-mədəni və idman nailiyyətlərinin artırılmasına xüsusi önəm verir.
Onun təşəbbüsü ilə regionda bir sıra innovativ layihələr - məktəblərdə STEAM tədris metodikasının tətbiqi, inklüziv təhsilin genişləndirilməsi, həmçinin məktəb-valideyn-icma əməkdaşlığının gücləndirilməsi istiqamətində mühüm addımlar atılır. Elçin Kərimovun fəaliyyətinin əsas qayəsini, təhsilin sadəcə dərs prosesi deyil, həm də milli dəyərlərə söykənən intellektual inkişaf mühiti kimi formalaşdırılması təşkil edir. Təhsil işçiləri və ictimaiyyət arasında onun ədalətli, tələbkar və eyni zamanda insanı münasibətləri ön planda tutan rəhbər obrazı formalaşmışdır. Elçin Kərimovun rəhbərliyi ilə həyata keçirilən tədbirlər nəticəsində Gəncə-Daşkəsən bölgəsində təhsil göstəriciləri yüksəlmipş, məktəblərin uğurları respublika səviyyəsində tanınmağa başlamışdır.
Elçin Kərimov təhsilin bütün pillələrində səmərəli idarəçiliyin təmin olunması, mövcud vəziyyətin obyektiv qiymətləndirilməsi və təhsil prosesinin keyfiyyətinin yüksəldilməsi istiqamətində ardıcıl və məqsədyönlü fəaliyyət göstərir. Onun təşəbbüsü ilə idarənin inzibati binasında hər həftənin cümə günü vətəndaşların açıq qapı formatında qəbulu təşkil olunur. Qəbul zamanı vətəndaşların müraciətləri fərdi qaydada dinlənilir, onların qaldırdıqları məsələlər - xüsusilə işə qəbul, iş yerlərinin dəyişdirilməsi və digər müraciətlər qanunvericiliyin tələblərinə uyğun şəkildə araşdırılır və operativ həll tədbirləri görülür. Bu təşəbbüs bir daha göstərir ki, Elçin Kərimov idarəçiliyə təkcə inzibati mexanizm kimi deyil, insan amilinə əsaslanan şəffaf və vətəndaşyönümlü bir sistem kimi yanaşır. Eyni zamanda, rəhbər şəxs kimi o, təhsil müəssisələrində mövcud vəziyyətlə yaxından tanış olmaq, real problemləri yerində öyrənmək və onların aradan qaldırılması üçün praktik həll yolları müəyyənləşdirmək məqsədilə mütəmadi olaraq müəllim və məktəb direktorlərı ilə görüşlər keçirir. Bu görüşlər zamanı tədris prosesinin keyfiyyətinə təsir edən amillər müəllimlərin peşəkar inkişafı, tədris resurslarının təminatı və idarəetmədə səmərəliliyin artırılması kimi mövzular ətrafında geniş müzakirələr aparılır.
Bununla yanaşı, Elçin Kərimov məktəbəqədər təhsilin inkişafını xüsusi diqqət mərkəzində saxlayaraq Gəncə şəhəri ərazisində yerləşən körpələr evi uşaq bağçalarını ziyarət edir, müəssisələrin maddi-texniki bazası və tədris şəraiti ilə əyani tanış olur. Məktəbəqədər təhsilin inkişaf perspektivləri, uşaqların sağlam mühitə uyğun formalaşması üçün yaradılan şərait, eləcə də pedaqoji heyətin fəaliyyəti barədə ətraflı məlumat alır, qarşıdakı dövr üçün müvafiq tapşırıq və tövsiyələr verir.
Beləliklə Gəncə-Daşkəsən Regional Təhsil İdarəsinin müdiri Elçin Kərimovun fəaliyyəti təhsilin bütün mərhələlərində real problemlərin vaxtında müəyyənləşdirilməsinə, onların sistemli həllinə və ümumilikdə bölgədə təhsil mühitinin fəaliyyətinin yüksəldilməsinə yönəlmiş ardıcıl və məqsədyönlü bir idarəçilik modelinin təzahürüdür.