Xalq artisti, rəqqasə Roza Cəlilova 96 yaşında vəfat edib.

“Gundelikxeber.org” Bakupost.az-a istinadən xəbər verir ki, o, Bakının Səbail rayonunda yaşadığı mənzildə dünyasını dəyişib.

Məlumata görə, onun həkiməqədər ölümü qeydə alınıb.

Qeyd edək ki, Roza Cəlilova 1929-cu ildə Qubada anadan olub. Bakı Xoreoqrafiya Məktəbini bitirib, uzun illər Azərbaycan Dövlət Filarmoniyasının Mahnı və Rəqs Ansamblında soloist kimi çıxış edib. Sonradan ansamblın bədii rəhbəri olub, “Gülüstan” və “Sevinc” rəqs kollektivlərinə rəhbərlik edib.

Milli rəqsin inkişafında böyük xidmətləri olan Xalq artisti 2019-cu ildə “Şöhrət” ordeni ilə təltif edilib.
Görkəmli xoreoqraf-baletmeyster, Xalq artisti Roza Cəlilovanın vəfatı ilə bağlı Mədəniyyət Nazirliyi məlumat yayıb. Bildiirilib ki, Azərbaycan mədəniyyətinə ağır itki üz verib:

“Milli rəqslərimizin mahir ifaçısı, görkəmli xoreoqraf-baletmeyster, pedaqoq, Xalq artisti Roza Cəlilova 19 noyabr 2025-ci il tarixində, 96 yaşında vəfat edib.
Roza İsmayıl qızı Cəlilova 17 may 1929-cu ildə Quba rayonunda anadan olub. 1947-ci ildə Bakı Xoreoqrafiya Məktəbini bitirib. İki il Opera və Balet Teatrının balet truppasında çalışıb. 1949-cu ildən Azərbaycan Dövlət Filarmoniyasının Mahnı və Rəqs Ansamblında fəaliyyətini davam etdirib. 1965–1975-ci illərdə ansamblın rəqs qrupuna rəhbərlik edib. O, həmçinin Azərbaycan Milli Konservatoriyası nəzdindəki İncəsənət Gimnaziyasında pedaqoji fəaliyyət göstərib.

Roza Cəlilova 1989-cu ildə yaratdığı “Gülüstan” mahnı və rəqs ansamblı ilə Kanada, Efiopiya, Çin, ABŞ, Türkiyə, İraq, Mərakeş və digər ölkələrdə qastrol səfərlərində olub, rəqs sənətimizi layiqincə təmsil edib. Sənətkarın repertuarında Azərbaycanın milli rəqsləri ilə bərabər, ərəb, fars, hind və bir sıra başqa xalqların rəqsləri də yer tutub.

Roza Cəlilovanın Azərbaycan rəqs sənətinin inkişafına verdiyi töhfələr dövlətimiz tərəfindən yüksək qiymətləndirilib. 2007-ci ildə “Xalq artisti” fəxri adına və 2019-cu ildə “Şöhrət” ordeninə layiq görülüb. Baletmeyster 2002-ci ildən Prezidentin fərdi təqaüdçüsü idi”.