Türkiyə Respublikasının Prezidenti Rəcəb Tayyib Ərdoğan Prezident İlham Əliyevə təbrik məktubu ünvanlayıb.

"Gundelikxeber.org" AZƏRTAC -a istinadən bildirir ki , məktubda deyilir:

“Cənab Prezident, əziz qardaşım.

Vətən Müharibəsində Qələbənin beşinci ildönümü münasibətilə Zati-alinizi və qardaş Azərbaycan xalqını öz adımdan və xalqım adından ürəkdən təbrik edirəm.

Ümid edirəm ki, bu şanlı Qələbədən sonra sülh prosesində atılan konstruktiv addımlar uzunmüddətli razılaşmaya gətirib çıxaracaq. İnanıram ki, dinc, sabit Qafqaz bütün regionun rifahına xidmət edəcək və onun qlobal siyasətdə strateji əhəmiyyətini daha da artıracaq.

İşğaldan azad edilmiş doğma torpaqlarımızın sürətlə dirçəlişi və bərpası istiqamətində əldə olunan nailiyyətlər yüksək qiymətə layiqdir. Bu əlamətdar günün ildönümündə Türkiyə kədərini kədər, sevincini sevinc sayan qardaş Azərbaycanın həm regionda, həm də onun hüdudlarından kənarda inamla əldə etdiyi tərəqqinin şahidi olmaqdan böyük qürur duyur.

“Bir millət, iki dövlət” prinsipi əsasında qurulan yüksək səviyyəli münasibətlərimiz, gücünü ortaq taleyimizdən alan qırılmaz qardaşlıq bağlarımız keçmişdə olduğu kimi, bu gün də möhkəmlənməkdədir.

Möhkəm təməl üzərində qurulan müttəfiqliyimiz və bütün sahələrdə nümayiş etdirdiyimiz xüsusi əməkdaşlığımız regional sülhün, etimadın və sabitliyin ən mühüm sütunlarından birinə çevrilib.

Şübhəsiz ki, doğma Azərbaycanımızın Sizin müdrik rəhbərliyinizlə qazandığı nailiyyətlər bundan sonra da rayonumuzun çiçəklənməsinə mühüm töhfə verəcəkdir.

Fürsətdən istifadə edərək Zati-alinizə möhkəm cansağlığı, dost və qardaş Azərbaycan xalqına xoş günlər və firavanlıq arzulayıram”.