"Azərbaycan ilə Qazaxıstan arasında münasibətlər qədim tarixə, ortaq dəyərlərə və qardaşlıq bağlarına əsaslanır. Hər iki xalq əsrlər boyunca bölgədəki mədəni, iqtisadi və ictimai proseslərə təsir edib, oxşar həyat tərzi və adət-ənənələr formalaşdırıb".

Bu sözləri açıqlamasında Milli Məclisin deputatı Pərvanə Vəliyeva deyib.


Onun sözlərinə görə 2005-ci il mayın 24-də Bakıda imzalanan "Azərbaycan Respublikası və Qazaxıstan Respublikası arasında strateji tərəfdaşlıq və müttəfiqlik münasibətləri haqqında" Müqavilə təkcə diplomatik bir sənəd deyil, eyni zamanda Azərbaycan və Qazaxıstan arasında səmərəli, çoxşaxəli və qarşılıqlı etimada əsaslanan əlaqələrin inkişafının simvoludur:

"Son illərdə bu əlaqələr xüsusilə enerji sektorunda strateji məna kəsb edib. Neft-qaz sahəsində iki ölkənin əsas şirkətləri - SOCAR və "KazMunayQaz" Milli Şirkəti arasında imzalanan Aktau-Ceyhan marşrutu üzrə saziş bu əməkdaşlığın mühüm göstəricisidir. Bu saziş çərçivəsində ildə 1,5 milyon ton Qazaxıstan neftinin Azərbaycan ərazisi vasitəsilə tranziti nəzərdə tutulur. Bu, təkcə iqtisadi deyil, həm də geosiyasi baxımdan mühüm hadisədir. Çünki Xəzər regionunda enerji marşrutlarının şaxələndirilməsini təmin edir və Qazaxıstan neftinin dünya bazarlarına çıxışı üçün yeni alternativlər yaradır".

"Azərbaycan və Qazaxıstan dənizə birbaşa çıxışı olmayan ölkələr olsa da, onlar bu vəziyyəti üstünlüyə çevirməyi bacarıblar. Xüsusilə logistika və bağlantılar baxımından Azərbaycan və Qazaxıstan arasında diversifikasiya olunmuş sistem qurulub: Bakı-Tbilisi-Ceyhan neft boru kəməri ilə enerji bağlantısı, Xəzər vasitəsilə su yolu bağlantısı, hava yolu ilə yükdaşımalar üzrə bağlantı, Xəzərin dibi ilə fiber-optik rabitə xətlərinin birgə tikintisi layihəsi üzrə rəqəmsal bağlantı, planlaşdırılan Zəngəzur dəhlizinin açılması ilə quru yolu - dəmiryolu bağlantısı və Xəzər-Qara dəniz-Avropa Yaşıl Enerji Dəhlizi üzrə yaşıl enerji bağlantısı. Bu isə, həm iqtisadi yüksəlişə, həm də xalqların bağlılığına töhfə verir.

Orta Dəhlizin güclü iqtisadiyyata malik etibarlı tərəfdaşları olan Azərbaycan və Qazaxıstan Respublikalarının əməkdaşlığı, Türk Dövlətləri Təşkilatı (TDT) çərçivəsində daha da inkişaf etdirilir. Bu inkişaf regional inteqrasiyaya bir neçə istiqamətdə, xüsusilə strateji və iqtisadi inteqrasiyanın dərinləşdirilməsinə təsir göstərir ki, bu da iki qardaş ölkənin vahid türk dünyası vizyonuna verdiyi töhfənin bariz göstəricisidir. TDT çərçivəsində müxtəlif qurumlar yaradılıb və bu qurumlar da üzv ölkələrin nazirlik və qurumları ilə əməkdaşlığı gücləndirib", - deyə millət vəkili vurğulayıb.

Parlamentari əlavə edib ki, son günlərdə Azərbaycanın istər Qəbələdə keçirilən Türk Dövlətlərinin 12-ci Zirvə görüşünə evsahibliyi etməsi, istər Düşənbədə MDB Sammitində iştirakı, istərsə də Prezident İlham Əliyevin Qazaxıstana rəsmi səfəri Mərkəzi Asiyanın müxtəlif formatlarda ayrılmaz tərkib hissəsi olduğunu göstərir:

"Etnik oxşarlıqlar, ortaq dil, din, mədəni və tarixi köklər Azərbaycan-Mərkəzi Asiya platformasını artıq altılıq konseptinə gətirib çıxarıb. Azərbaycan uğurlu regional siyasətin nəticəsində və yeni reallıqda Mərkəzi Asiya regionuna elə dərin inteqrasiya edib ki, artıq yeni geosiyasi quruluş - "6-lıq" kimi xarakterizə olunur. Prezident İlham Əliyevin xüsusi xidmətləri sayəsində Türk Dövlətləri Təşkilatı artıq vahid platforma kimi çıxış edir. Bu "6-lıq" logistika baxımdan vahid mərkəzdir: Mərkəzi Asiya+Azərbaycan və Avropa marşrutu alternativ, sabit və təhlükəsiz ticarət yoluna çevrilir. Bu istiqamətdə yükdaşımaları artıb, iqtisadi əlaqələr, humanitar, mədəni əlaqələr sürətlə inkişaf edir.

Hazırkı münasibətlərin dinamikası bu əlaqələrin gələcəkdə daha da güclənəcəyini göstərir. Bu inteqrasiya, həm də regional təhlükəsizlik, ticarət və energetika sahələrində daha geniş imkanlar açır".