"Rusiya Azərbaycanla humanitar əlaqələri, Azərbaycan tərəfdaşları qədər bərpa etməyə hazırdır, ölkələr arasında mədəniyyət sahəsindəki əlaqələri bərpa etməmək üçün səbəb yoxdur".

"Gundelikxeber.org" məlumatına görə, bunu "RIA Novosti"yə verdiyi müsahibəsində Rusiya prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy deyib.

"Biz həmişə demişik ki, Rusiya tərəfdaşlarının hazır olduğu hər şeyə hazırdır. Azərbaycanlı dostlarımız və həmkarlarımız humanitar əlaqələrin, elm, təhsil, mədəniyyət sahəsində əlaqələrin bərpasına nə qədər hazırdırlarsa, biz də o qədər hazırıq", - deyə Şvıdkoy ölkələr arasında mədəni əlaqələrin bərpa olunması perspektivindən danışarkən bildirib.

O vurğulayıb ki, Rusiya ilə Azərbaycanı əsrlik tarix birləşdirir, xalqlar çox sıx ailə bağları ilə bağlıdırlar və hər iki ölkənin cəmiyyəti üçün təməl olan mənəvi-əxlaqi dəyərləri bölüşürlər.

"Mənə elə gəlir ki, bütün əlaqələri tam həcmdə bərpa etməmək üçün əsaslı səbəblərimiz yoxdur", - deyə Şvıdkoy qeyd edib.

Xatırladaq ki, daha əvvəl iyun ayında Azərbaycan Mədəniyyət Nazirliyi Azərbaycanda Rusiya dövlət və özəl qurumları tərəfindən keçirilməsi planlaşdırılan bütün mədəniyyət tədbirlərinin, o cümlədən konsertlər, festivallar, tamaşalar, sərgilər və digərlərinin ləğv olunduğunu bildirmişdi.