"Azərbaycan Respublikası Prezidentinin Sərəncamı ilə təsis edilən Yüksəkixtisaslı Miqrant Proqramının əsas məqsədi müasir tələblərə cavab verən yüksəkixtisaslı əcnəbilərin və vətəndaşlığı olmayan şəxslərin Azərbaycan Respublikasında işləməsini təşviq etmək, onların bilik və bacarıqlarını ölkənin sosial-iqtisadi inkişafına yönəltmək, habelə bu sahədə çevik idarəetmə və əlaqələndirmə mexanizmini formalaşdırmaqdır".

"Gundelikxeber.org" xəbər verir ki, bu fikirləri jurnalistlərə açıqlamasında Dövlət Miqrasiya Xidmətinin (DMX) rəisi Vüsal Hüseynov deyib.

O bildirib ki, sözügedən proqram iştirakçılarının müraciətlərinin qəbulunu və cavablandırılmasını "bir pəncərə" prinsipi əsasında təmin etmək məqsədilə DMX tərəfindən Yüksəkixtisaslı Miqrant Portalı yaradılıb:

"Portal "uğur hekayəsi üçün Azərbaycana yolunuz" ifadəsinin ingilis dilində qarşılığının ("Your Path to Azerbaijan for Success Story") abreviaturasını özündə əks etdirən www.pass.gov.az ünvanı ilə təqdim olunub. "Pass" həm də miqrasiya sahəsində "keçid", "icazə" mənasını bildirən terminologiya kimi istifadə olunan ifadədir.

Portalın Azərbaycan dili ilə yanaşı türk, ingilis və rus dillərində fəaliyyət göstərməsi bu platformanın daha geniş auditoriyaya çıxışını təmin edib, Proqramla bağlı məlumatların müxtəlif dillərdə əlçatan olmasına şərait yaradıb və yüksəkixtisaslı əcnəbilərin Azərbaycana marağının artmasına xidmət edib".

Xidmət rəisi əlavə edib ki, portal istifadəçilərə Yüksəkixtisaslı Miqrant Proqramında iştirakla bağlı güzəştlər, tələblər, qiymətləndirmə meyarlarına dair, o cümlədən digər faydalı məlumatlar təqdim edib:

"Proqramda iştirak etmək istəyən əcnəbilər bu portal vasitəsilə qeydiyyatdan keçərək təhsil, iş təcrübəsi, xarici dil bilikləri və digər məlumatlarını təqdim etməklə elektron formada müraciət ediblər. Müraciətləri müsbət cavablandırılan və yüksəkixtisaslı miqrant statusu əldə edən əcnəbilərə Azərbaycanda yaşamaq və əmək fəaliyyəti ilə məşğul olmaqla bağlı bir sıra güzəştlər tətbiq olunub.

Portal Azərbaycanda fəaliyyət göstərən sahibkarlara da yeni imkanlar yaradıb - işəgötürənlər qeydiyyatdan keçərək ehtiyac duyulan sahələr üzrə əcnəbi mütəxəssislər barədə sorğu edə və məlumat əldə edə biliblər".