21 dekabr tarixində Səbail rayonunun Badamdar qəsəbəsində yerləşən 236 nömrəli tam orta məktəbdə Azərbaycan ədəbiyyatının görkəmli nümayəndəsi, böyük şair və ictimai xadim Bəxtiyar Vahabzadənin anadan olmasının 100 illiyinə həsr olunmuş mənalı və yaddaqalan tədbir keçirilib.
Tədbir giriş sözü ilə məktəbin direktoru Rövşən Qasımov tərəfindən açılıb. Direktor çıxışında Bəxtiyar Vahabzadə yaradıcılığının milli düşüncənin formalaşmasında, vətənpərvərlik ruhunun aşılanmasında oynadığı müstəsna roldan bəhs edərək, onun poeziyasının bu gün də aktuallığını qoruduğunu xüsusi vurğulayıb.
Daha sonra məktəbin şagirdləri böyük şairin zəngin yaradıcılığına özünəməxsus təqdimatlarla “kiçik, lakin dərin mənalı bir səyahət” ediblər. Şairin vətənə, millətə, dövlətə və ana dilinə olan sonsuz sevgisi, milli təəssübkeşlik ruhu şagirdlərin səsləndirdiyi şeirlərdə, səhnəciklərdə və bədii kompozisiyalarda canlandırılıb. Körpə fidanların nitqində səslənən Vahabzadə şeirləri tədbir iştirakçılarının qəlbində silinməz iz buraxaraq, sanki qanad açıb səmalara yüksəlib.
Təxminən bir saat davam edən tədbir iştirakçılar üçün unudulmaz anlarla yadda qalıb və bir daha sübut edib ki, böyük sənətkarlar fiziki olaraq aramızdan getsələr də, onların ideyaları, yaradıcılığı və ruhu daim yaşayır.
Qeyd edək ki, tədbirin təşkili və ssenari müəllifliyi 236 nömrəli tam orta məktəbin Azərbaycan dili və ədəbiyyat müəlliməsi Xəyalə Quliyevaya məxsusdur. Onun peşəkarlığı və yaradıcı yanaşması sayəsində yubiley tədbiri yüksək səviyyədə təşkil olunaraq iştirakçıların rəğbətini qazanıb.