Sevda Mehdizadə: Azərbaycan tariximizin ən güclü dövrünü yaşayır [xfgiven_qirmizi] [xfvalue_qirmizi] [/xfgiven_qirmizi]
“32 N-li uşaq bağçasının müdiri Sevda Mehdizadə - Azərbaycan demək olar ki, tariximizin bütün dönəmlərində çətin və ağır sınaqlardan keçmişdir. Xalqımız 1918-ci il mayın 28-də çar Rusiyasının bir əsrdən artıq davam edən müstəmləkə əsarətindən azad olmuş, Şərqin ilk demokratik respublikasının təməlini qoymuşdur. Azərbaycan müstəqillik əldə etmişdir. Cəmi 23 ay fəaliyyət göstərməsinə baxmayaraq, ilk müstəqillik dövründə həyata keçirilən tədbirlər müstəqil dövlətçiliyimizin əsaslarının yaradılması və gələcək inkişaf yolunun müəyyənləşdirilməsi baxımından mühüm əhəmiyyət kəsb etdi. Yeni qurulan Azərbaycan Xalq Cümhuriyyəti öz üzərinə götürdüyü çətin tarixi vəzifəni şərəflə yerinə yetirdi. Azərbaycanın ilk Parlamenti və Hökuməti, dövlət aparatı təşkil edildi, ölkənin sərhədləri müəyyənləşdirildi, bayrağı, himni və gerbi yaradıldı, ana dili dövlət dili elan edildi, ordu quruculuğu sahəsində ciddi tədbirlər həyata keçirildi, maarifin və mədəniyyətin inkişafına xüsusi diqqət yetirildi. Azərbaycanın ilk universiteti təsis olundu, təhsil milliləşdirildi, xalqın sonrakı illərdə mədəni yüksəlişi üçün zəmin hazırlayan, ictimai fikir tarixi baxımından müstəsna əhəmiyyətli işlər görüldü. 1918-ci ilin mayından 70 il keçəndən sonra Azərbaycan xalqı yenidən ayağa qalxdı, öz haqqını: azadlığını, müstəqilliyini və bütövlüyünü tələb etdi. Bu yolda şəhidlər verdi, lakin yolundan dönmədi. 1991-ci ilin oktyabrında Azərbaycan xalqı XX əsrdə ikinci dəfə öz müstəqilliyini bərpa etdi. 1993-cü ilin may-iyun aylarında hökumət böhranının son dərəcə kəskinləşməsi ilə ölkədə vətəndaş müharibəsinin baş verməsi və müstəqilliyin itirilməsi təhlükəsi yarananda xalqın çağırışı ilə Ümummilli Lider Heydər Əliyev ikinci dəfə hakimiyyətə gətirildi və Azərbaycan müstəqilliyinin yeni mərhələsinə qədəm qoydu. Bununla da, Azərbaycanın ictimai-siyasi, sosial, iqtisadi, elmi-mədəni həyatında, beynəlxalq əlaqələrində əsl dönüş yarandı və elmi əsaslara, beynəlxalq norma və prinsiplərə uyğun dövlət quruculuğu prosesinə başlandı. Bir sözlə dahi Heydər Əliyevin şah əsəri olan müasir müstəqil Azərbaycan dövləti quruldu və ölkəmiz sürətli inkişaf yoluna qədəm qoydu. Ulu Öndər Heydər Əliyev Cümhuriyyət haqqında söylədiyi fikirlər həqiqətən onu göstərir ki, bugünükü Azərbaycan 1918-ci ildə yaradılmış ilk müstəqil dövlətimizin varisidir. “Müsəlman Şərqində ilk demokratik cümhuriyyətin məhz Azərbaycan torpağında yaranması xalqımızın o dövrdə və o illər ərəfəsində – XIX əsrin sonunda və XX əsrin əvvəllərində milli müstəqillik, azadlıq duyğuları ilə yaşaması ilə bağlıdır. O illərdə xalqımızın qabaqcıl şəxsiyyətləri, mütəfəkkir adamları, ziyalıları xalqımızda milli azadlıq, milli müstəqillik duyğularını gücləndirmiş, milli dirçəliş, milli oyanış əhval-ruhiyyəsi yaymış və bunların hamısı məntiqi olaraq Azərbaycan Xalq Cümhuriyyətinin yaranmasına gətirib çıxarmışdır.” Bəli, həqiqətən hər bir xalqın milli azadlıq və istiqlaliyyət tarixində xilaskar rolunu oynayan dahi insanlar var. Həmin dahilər öz qətiyyətləri ilə mənsub olduqları xalqı arxasınca aparıb, ən taleyüklü məqamlarda qalib rolu oynamışlar. Azərbaycan xalqının Ümummilli lideri Heydər Əliyev müasir dünya tarixinə parlaq və silinməz iz qoymuş böyük şəxsiyyət, qeyri-adi zəka, fitri istedad sahibi, müdrik dövlət xadimi kimi düşmüşdür. Bu bir tarixi faktdır ki, əgər Ulu Öndər Heydər Əliyev olmasa idi bugünkü müstəqil Azərbaycan dövləti də var olmayacaqdı.
Ümummilli Liderin uzaqgörən və düzgün siyasətini Prezident İlham Əliyev uğurla davam etdirir. Dövlətimizin başçısının sərəncamları ilə 2018-ci il ölkəmizdə “Azərbaycan Xalq Cümhuriyyəti İli” elan olundu və AXC-nin 100 illik yubileyi təntənəli şəkildə qeyd edildi. Azərbaycan 2020-ci ilin sentyabrında başladığı əks-hücum əməliyyatı ilə cəmi 44 gün ərzində erməni təcavüzkarlarını döyüş meydanında darmadağın etdi. Nəticədə əzəli torpaqlarımız düşmən tapdağından azad olundu, işğala və uzun illərdir davam edən mənfur siyasətə son qoyuldu. Bu isə məhz cənab Ali Baş Komandanımız İlham Əliyevin peşəkar rəhbərliyi və Azərbaycan Ordusunun rəşadəti hesabına mümkün oldu. Bu gün “Böyük Qayıdış” proqramı uğurla icra olunur, doğma Qarabağ və ətraf digər rayonlarımız cənnətə çevrilir, vətəndaşlarımız öz dədə-baba yurduna böyük sevinc və coşqu hissi ilə geri dönür. Həqiqətən də müstəqilliyi əldə etməkdən də çətin bir iş onu qorumaq və əbədiliyini təmin etməkdir. Məhz Prezident İlham Əliyevin ali rəhbərliyi ilə Azərbaycan tariximizin ən güclü dövrünü yaşayır, müstəqil, demokratik dövlət kimi sayasız-hesabsız uğurlara imza atır və böyük inkişaf yolu keçir.
