Honqkonqu matəmə qərq edən “Wang Fuk Court” yanğını 128 nəfərin ölümü ilə nəticələnib və bu, 1948-ci ildən bəri şəhərdə baş verən ən ağır yanğın hesab olunur.

“Gundelikxeber.org” xəbər verir ki, Tay Po rayonunda yerləşən yaşayış kompleksində baş verən yanğın saniyələr içində bir neçə mərtəbəni əhatə edib.

Yanğının sürətlə yayılmasına binada aparılan təmir işləri zamanı istifadə olunan tezalışan izolyasiya materialları, evakuasiya çıxışlarının məhdudluğu və siqnalizasiya sisteminin gec işə düşməsi səbəb olub. Hakimiyyət bu hadisəni müasir Honqkonqun ən faciəvi yanğını adlandırıb.

Buna bənzər böyük yanğınlardan biri 1996-cı ildə “Garley Building”də baş verib.

Bir neçə gün əvvələ kimi şəhərin əvvəlki ən böyük yanğını da məhz o hesab olunurdu.

41 nəfərin ölümü ilə nəticələnən yanğın o vaxt təmir zamanı aparılan qaynaq işləri səbəbindən başlayıb lift şaxtasından sürətlə yayılmışdı.

Elə o faciədən sonra da hökumət lift sistemləri və təmir mexanizmləri ilə bağlı təhlükəsizlik standartlarını sərtləşdirmişdi.

2011-ci ildə Monqkokda baş verən bazar yanğını da uzun müddət gündəmdə qalmış, 9 nəfərin ölümü ilə nəticələnmişdi.

Elektrik kabellərinin həddən artıq yüklənməsi və qeyri-leqal köşklərin sıx düzülməsi hadisənin miqyasını daha da artırmışdı.

1972-ci ildə Şekkip Mey qəsəbəsində baş verən hadisədə isə 24 nəfər həlak olmuşdu.

Taxta konstruksiyalı köhnə bina bir neçə dəqiqə ərzində alova bürünərək tamamilə yararsız vəziyyətə düşmüşdü. Həmin hadisə şəhərdə köhnə məhəllələrin mərhələli yenilənməsi prosesinə start verilməsi üçün zəmin yaratmışdı.

Budəfəki yanğın isə təkcə insan itkisi sayına görə deyil, həm də müasir, yeni təmir olunan binada baş verməsi baxımından digərlərindən fərqlənir. Əvvəlki illərdəki böyük yanğınların əksəriyyəti ya köhnə konstruksiyalı binalarda, ya da ticarət obyektlərində baş vermişdisə, bu dəfə faciə müasir yaşayış kompleksində qeydə alınıb.

Ölüm sayının kəskin yüksək olması isə bir neçə amillə əlaqələndirilir.

Burada xüsusilə yanıcı izolyasiya materiallarının istifadəsi, tüstünün qapalı koridorlara sürətlə yayılması, bəzi çıxışların təmir səbəbindən qismən bağlı olması, sakinlərin gec xəbərdar edilməsi.

Lakin ən yanğının belə dəhşətli hal almasında əsas səbəb kimi bambuk materialından olan konstruksiyalardan istifadə olunması əsas gətirilir. Qeyd edək ki, Honkonq bambuk çərçivələrin tikintidə geniş istifadə olunduğu azsaylı yerlərdən biridir.

Təhlükəsizlik səbəbindən hökumət bu ilin mart ayında bu praktikadan tədricən imtina etmək qərarı verib.

Rəsmilər artıq şəhərdə yanğınla bağlı qaydaların yenilənməsi, istehsalda istifadə olunan materiallara nəzarətin gücləndirilməsi və köhnə binaların təkrar auditindən ibarət genişmiqyaslı plan hazırladıqlarını bildirir.