ABŞ Prezidenti Donald Tramp Venesuelanın neftindən ölkəsinin strateji neft ehtiyatlarının bərpası üçün istifadə ediləcəyini açıqlayıb.

Tramp bildirib ki, Venesueladan əldə ediləcək neft ABŞ-nin strateji ehtiyatının doldurulmasına yönəldiləcək. O, bu nefti “Venesuela xalqından ABŞ xalqına hədiyyə” adlandırıb.

ABŞ lideri daha əvvəl Venesuela ilə əldə olunan razılaşma çərçivəsində 65 milyard barreldən çox təsdiqlənmiş neft ehtiyatı üzərində ABŞ-nin nəzarətinin təmin edildiyini açıqlamışdı. Tramp bu razılaşmanı “dünyanın ən böyük neft sövdələşməsi” adlandırıb.

Məlumata görə, razılaşma Venesuelada 17 strateji neft yatağının işlənməsini nəzərdə tutur. ABŞ hökuməti və özəl şirkətlərin iştirakı ilə yaradılan yeni struktur vasitəsilə yataqların işlənməsi planlaşdırılır.

ABŞ-nin strateji neft ehtiyatları son illərdə müxtəlif qlobal böhranlar fonunda əhəmiyyətli dərəcədə azalıb. Hazırda ehtiyatların həcmi 1982-ci ildən bəri ən aşağı səviyyələrdən birindədir.

Trampın açıqlamasına görə, Venesuela neftinin ABŞ-ın strateji ehtiyatlarının yenidən artırılmasında mühüm rol oynaması gözlənilir. Lakin neftin faktiki olaraq ehtiyata nə vaxt və hansı həcmdə daxil ediləcəyi ilə bağlı dəqiq müddət hələ açıqlanmayıb.

Razılaşmanın Venesuelanın neft sənayesinə böyük investisiyalar cəlb etməsi və ölkənin neft hasilatının artırılması da planlaşdırılır. Venesuelanın müvəqqəti prezidenti Delcy Rodriges razılaşmanın ölkənin iqtisadiyyatının bərpasına xidmət edəcəyini bildirib.