Ailəsi məşhur aktyor Bryus Uillisin ölümündən sonra onun beynini elmi məqsədlər üçün bağışlamaq niyyətindədir.

“Gundelikxeber.org” “The WP Times” nəşrinə istinadən xəbər verir ki, onun həyat yoldaşı Emma Heminq-Uillis yeni kitabında bu qərarın səbəbini açıqlayıb.

O, aktyorun artıq bir neçə ildir ki, alın-gicgah demensiyası (FTD) xəstəliyi ilə mübarizə apardığını bildirib. Emma onlar üçün hər ötən günün yeni emosional mübarizə şəraitində keçdiyini, lakin ailə olaraq təkcə özlərinə deyil, həm də oxşar diaqnozla üzləşən insanlara faydalı ola biləcək qərar qəbul etdiklərini söyləyib.

Onun sözlərinə görə, belə tədqiqatlar son dərəcə vacibdir: “Ölümdən sonra beyin toxumaları alimlərə FTD ilə əlaqəli protein anomaliyalarını, genetik mutasiyaları aşkar etməyə və nəticədə, bu xəstəliyin diaqnostikası və müalicəsində inkişafa nail olmağa kömək edə bilər”.

Qeyd edək ki, bir müddət öncə B. Uillis çimərlikdə gəzinti zamanı görüntülənmişdi. Məşhur aktyora 2023-cü ildə demensiya diaqnozu qoyulub. Bu xəstəlik özünü emosional və sosial bacarıqların itirilməsi ilə büruzə verir. Ağır formalarında isə xəstələr ən doğma insanlarını belə tanımamağa başlayır.

70 yaşlı Bryus Uillis və 47 yaşlı Emmа-Heminq Uillis 2009-cu ildə ailə qurublar. Cütlüyün Meybl Rey Uillis və Evelin Penn Uillis adlı iki qızı var.