2025-ci il ərzində Azərbaycanda vergi hüquqpozmaları ilə bağlı 2 131 cinayət işi icraatda olub.

Bu barədə Dövlət Vergi Xidməti məlumat yayıb.

Bu göstərici 2024-cü illə müqayisədə 53,9% artıb.

Hesabat dövründə başa çatmış cinayət işləri üzrə vurulmuş ziyan 202,7 milyon manat təşkil edib. Həmin cinayət işləri üzrə dövlət büdcəsinə 156 milyon manat ödənilib.

İcraatda olmuş 2 131 cinayət işinin 1 007-si (47,3%) icraatı təzələnmiş, 980-i (46%) başlanmış, 75-i (3,5%) əvvəlki ildən icraatda qalmış, 39-u (1,8%) başqa işlərdən ayrılmış, 20-si (0,9%) qaytarılmış, 10-u (0,5%) isə digər hüquq-mühafizə orqanlarından daxil olmuş işlərdir.

İl ərzində 7 şəxs barəsində həbs qətimkan tədbiri seçilib.

Ötən il Dövlət Vergi Xidmətinin Vergi Cinayətlərinin İbtidai Araşdırılması Baş İdarəsi tərəfindən vergi hüquqpozmaları ilə bağlı başlanılmış 980 cinayət işinin 867-si vergilərin, işsizlikdən sığorta, icbari tibbi sığorta və ya məcburi dövlət sosial sığorta haqlarının ödənilməsindən yayınma, 74-ü aksiz markası ilə markalanmalı malların markasız və ya məcburi nişanlanmalı malların nişansız satılması, satış məqsədilə saxlanılması və ya nağd qaydada satılması, 20-si əmək müqaviləsi olmadan işçilərin işə cəlb edilməsi, 19-u isə digər cinayətlərlə bağlı olub.

Bundan başqa, hesabat dövründə tərəfindən əmək müqaviləsinin yoxlanması ilə bağlı keçirilmiş nəzarət tədbirləri çərçivəsində 38 vergi ödəyicisi və 43 obyekt yoxlanılıb. Nəticədə, 196 nəfər fiziki şəxsin əmək müqaviləsi olmadan işə cəlb edilməsi müəyyənləşdirilib və ümumilikdə 398 min manat maliyyə sanksiyası tətbiq edilib.