Azərbaycan mediasında yeni rəqəmsal yayım mərhələsinin əsas iştirakçılarından birinə çevrilməyi hədəfləyən BTV Xəbər fəaliyyətində yeni mərhələyə start verir.

“Qafqazinfo” xəbər verir ki, 5 avqust 2026-cı ildə rəsmi fəaliyyətə başlayan BTV Xəbər qısa müddətdə xəbər portalından çoxplatformalı rəqəmsal media qurumuna çevrilmək istiqamətində genişmiqyaslı inkişaf strategiyası həyata keçirir.

BTV Xəbərin əsas informasiya platforması btvxeber.comportalıdır. Bununla yanaşı, media qurumu “Facebook”, “Instagram”, “YouTube” və “TikTok” kimi aparıcı rəqəmsal platformalarda fəaliyyət göstərərək xəbərləri operativ şəkildə müxtəlif formatlarda auditoriyaya təqdim edir.

BTV Xəbərin təsisçisi Sahil İmanov, baş redaktoru isə Mais Ağayevdir. Media qurumunda qarşıdakı mərhələ üçün yeni simaların komandaya cəlb olunması istiqamətində də proses aparılır. Jurnalistika, televiziya, prodakşn, operatorluq, montaj və rəqəmsal media sahəsində peşəkarların BTV Xəbər komandasına cəlb edilməsi nəzərdə tutulur.BTV Xəbərin yeni strategiyası yalnız xəbər saytının inkişafı ilə məhdudlaşmır. Qarşıya qoyulan əsas məqsəd rəqəmsal platforma yayımçısı formatında fəaliyyət göstərən yeni nəsil media modeli formalaşdırmaqdır.

Bu istiqamətdə ən mühüm mərhələlərdən biri isə 2026-cı ilin oktyabr ayından etibarən BTV Xəbərin platforma yayımçısı kimi fəaliyyətinin genişləndirilməsi olacaq.

Hazırda bununla bağlı kanalın maddi-texniki bazasının gücləndirilməsi istiqamətində işlər aparılır. Studiyanın və çəkiliş imkanlarının yenilənməsi, müasir texniki avadanlıqların tətbiqi, efir imkanlarının genişləndirilməsi və yayım prosesinin yeni texnologiyalar əsasında qurulması əsas prioritetlər sırasındadır.

BTV Xəbərin yeni mərhələsində “YouTube” üzərindən canlı yayım xüsusi yer tutur. Layihənin reallaşdırılması ilə kanalın günün əsas hadisələrini canlı şəkildə təqdim etməsi, hadisə yerlərindən birbaşa bağlantılar həyata keçirməsi, xüsusi buraxılışlar, müsahibələr, xəbər bülletenləri və müxtəlif proqram formatları təqdim etməsi planlaşdırılır.

Beləliklə, BTV Xəbər yalnız xəbəri internetdə yayımlayan platforma olmaqdan çıxaraq xəbərin hazırlanmasından canlı efirə qədər bütün mərhələləri özündə birləşdirən rəqəmsal media sisteminə çevrilməyi hədəfləyir.

Kanalın inkişaf strategiyasında xüsusi reportajlar, eksklüziv müsahibələr, hadisə yerindən operativ bağlantılar, araşdırma materialları, vətəndaş müraciətləri və gündəmin əsas mövzularına dair video kontentin genişləndirilməsi də nəzərdə tutulur.

BTV Xəbərin rəhbərliyi hesab edir ki, müasir media yalnız sürətli xəbər yaymaqla kifayətlənməməli, xəbərin hazırlanması, yoxlanılması, təqdim olunması və auditoriyaya çatdırılması prosesini vahid rəqəmsal sistemə çevirməlidir.Məhz bu yanaşma BTV Xəbərin qarşıdakı mərhələdəki əsas xəttini təşkil edir: peşəkar jurnalistika, operativ xəbər, güclü komanda, müasir texnologiyalar, canlı yayım və çoxplatformalı media.

BTV Xəbər qarşıdakı dövrdə yeni simaların komandaya cəlb edilməsi, maddi-texniki bazanın gücləndirilməsi və rəqəmsal yayım imkanlarının genişləndirilməsi ilə Azərbaycan media məkanında yeni format formalaşdırmağa hazırlaşır.

Yeni mərhələ artıq başlayır. BTV Xəbər rəqəmsal mediadan rəqəmsal yayımçılığa keçid edir.