Rusiyada azərbaycanlı direktorun namizədliyi ləğv olunub.

Belə ki, keçmiş deputat Aleksandr Qliskovun işi üzrə əsas şahid hesab olunan Səməd Yusubov Krasnoyarsk diyarının Qanunvericilik Məclisinə seçki yarışından kənarlaşdırılıb.

Məlumata görə, Yusubov Rusiya Kommunist Partiyasının Şarıpovo regional qrupunda siyahının birinci nömrəsi olub. Lakin avqustun 21-də seçki komissiyası partiyanın diyar komitəsinin bürosunun qərarı əsasında onu namizədlər siyahısından çıxarıb. Qərarın səbəbləri ictimaiyyətə ətraflı açıqlanmayıb.

Səməd Yusubov uzun illər “KrayDEO” müəssisəsində çalışıb, rəhbər müavini və direktor vəzifələrini tutub. O, 2018–2023-cü illərdə “Ədalətli Rusiya” Partiyasından Krasnoyarsk Şəhər Şurasının deputatı olub.

2023-cü ildə Yusubov özü də vəzifə səlahiyyətlərindən sui-istifadə işi üzrə təqsirləndirilən şəxs qismində istintaqa cəlb edilib. Lakin 2024-cü ilin fevralında cinayət təqibinə müddətin keçməsi səbəbindən xitam verilib. İşdə 3,6 milyon rublun ehtimal olunan mənimsənilməsi ilə bağlı epizod da yer alıb.

Daha sonra Yusubovun ifadələri Aleksandr Qliskovun cinayət işi üçün mühüm əhəmiyyət daşıyıb. İstintaqın versiyasına görə, Qliskov 2017-ci ildə vasitəçi ilə “KrayDEO” rəhbərinin müavinindən himayədarlıq müqabilində 5 milyon rubl tələb edib və bunun 1 milyon rublunu alıb. Qliskov ittihamları qəbul etməyib.

2024-cü ilin oktyabrında o, 10 il müddətinə azadlıqdan məhrum edilib. Lakin 2026-cı ilin fevralında Krasnoyarsk Diyar Məhkəməsi hökmü ləğv edib və işi prokurorluğa qaytarıb.

Avqust ayında Qliskova yeni ittiham irəli sürülüb. Ehtimal olunan rüşvətin verilmə müddəti 2017-ci il mayın 18–22-si kimi dəqiqləşdirilib, “KrayDEO”ya qarşı “informasiya təzyiqi” dövrü isə 2016-cı ilin oktyabrına qədər genişləndirilib. Müdafiə tərəfi hesab edir ki, ittihamdakı bu dəyişikliklər mövcud materiallara uyğunlaşdırma cəhdidir.