Azərbaycan Premyer Liqasının 11-ci turunda baş tutan “Qarabağ” – “Neftçi” oyununda hakimi söyən və buna görə dörd oyunluq cəza alan Samir Abasovun görüntüləri klub rəhbərliyinin narazılığına səbəb olub.

“Gundelikxeber.org” xəbər verir ki, həmin görüntüləri yayan Sportlife.az saytı ilə reklam əməkdaşlığına birtərəfli şəkildə xitam verilib.

Bu barədə saytın baş redaktoru Mirələm Həsənli feysbuk hesabında paylaşım edib. O, paylaşımda “Neftçi”nin mətbuat xidməti tərəfindən təzyiqlə üzləşdiyini bildirib: “Neftçi” klubunun noyabrın 9-da “Qarabağ”a qarşı keçirdiyi oyundan sonra komandanın baş məşqçisi Samir Abasovun hakimə qarşı etik normalara zidd ifadə işlətməsi təsadüfən əməkdaşımız tərəfindən lentə alınıb və bu fakt ictimai maraq daşıdığı üçün yayımlanıb.

Sözügedən video hər hansı manipulyasiya, şəxsi maraq və ya qərəz məqsədi daşımırdı. Məqsəd idmanda davranış mədəniyyətinə diqqət çəkmək və sağlam idman mühitinin qorunmasına töhfə vermək idi. Daha sonra videonun silinməsi barədə mənə klubun mətbuat katibi tərəfindən vatsap üzərindən müraciət olunub. Lakin mən baş redaktor olaraq peşə borcuma və jurnalist etikasına sadiq qalaraq bu təklifdən imtina etmişəm.

Bundan əlavə, ötən ilin dekabr ayında klubun media üzrə koordinatoru Rüstəm Əfsərli tərəfindən mənə “Neftçi”nin Müşahidə Şurasının sədri Hafiz Zeynalovun adının hazırladığım materialdan çıxarılması ilə bağlı qeyri-peşəkar xarakterli xahiş edilib və o zaman da imtina etmişəm. Bu kimi müdaxilə cəhdləri də jurnalist fəaliyyətinə təsir göstərmək təşəbbüsü kimi qiymətləndirilməlidir”.

Qeyd edək ki, Samir Abasov matç başa çatan kimi paltardəyişmə otağına gedərkən üzünü hakimlər otağına tutaraq referiləri təhqir etmişdi. O, baş hakim Elçin Məsiyevin onların qapısına penalti təyin etməsindən narazı qalaraq qarşılaşmadan sonra keçirilən mətbuat konfransında da narazılığını dilə gətirmişdi.