2-3 gün əvvəl Neyromed klinikasından zəng edilərək təklif olunan müayinə (check-up) paketindən yararlanmaq üçün klinikaya müraciət etdik. Yoldaşımın səhhəti ilə bağlı narahatlığımız olduğundan vaxt itirmədən həkim müayinəsi, USM və digər müayinələrdən keçdik.

Lakin ödəniş zamanı gözlənilməz vəziyyətlə qarşılaşdıq.

Gündəlikxəbər.org xəbər verir ki, bu barədə “Müştəriyəm, Şikayətim Var” Facebook qrupunda Gülnar Hüseynova paylaşım edib.

Onun sözlərinə görə, ödəniş etdikdən sonra kassadan çek tələb etsə də, çek ona təqdim edilməyib. Klinikanın çıxışında yenidən kassaya yaxınlaşaraq çekini istədikdə isə bu dəfə “POS-terminalın zaryatkası yoxdur” bəhanəsi ilə çek verilməsindən imtina edildiyi bildirilib.

Şikayətçinin sözlərinə görə, həmin vaxt klinikada çek gözləyən digər pasiyentlər də olub.

Gülnar Hüseynova məsələ ilə bağlı etiraz edib şikayət edəcəyini bildirdikdə isə kənarda kompüter arxasında əyləşən əməkdaşlardan birinin ona “Onsuz da bizdə ƏDV verilmir” dediyini iddia edib.

Şikayətçi qeyd edir ki, məsələ yalnız ƏDV ilə bağlı deyil. Onun fikrincə, əsas məsələ göstərilən tibbi xidmətə görə kassa çekinin vaxtında təqdim edilməməsi və bununla bağlı müxtəlif bəhanələrin səsləndirilməsidir.

İddialara görə, şikayət edəcəyini bildirdikdən sonra klinika əməkdaşları məsələni həll etməyə çalışıblar və sonradan çek WhatsApp vasitəsilə elektron formada göndərilib.

Lakin şikayətçinin sözlərinə görə, göndərilən çekdə də sual doğuran məqam aşkarlanıb. Belə ki, çekdə göstərilən vurulma saatının klinikada ödəniş və müayinələrin aparıldığı vaxtla uyğun gəlmədiyi bildirilir. Şikayətçi çekin fotosunu da təqdim edəcəyini qeyd edib.

Bu halın qanunvericiliyə uyğun olub-olmaması və çekin nə üçün ödəniş zamanı deyil, daha sonra təqdim edilməsi aidiyyəti qurumların araşdırması ilə müəyyənləşdirilə bilər.

Şikayətçi Dövlət Vergi Xidmətini məsələni araşdırmağa və Neyromed klinikasında kassa əməliyyatlarının qanunvericiliyə uyğun aparılıb-aparılmadığına hüquqi qiymət verməyə çağırıb.