Abbasova Fidan Loğman qızının ərazi narkoloji dispanserində profilaktik qeydiyyata alınması barədə qanuni qüvvəyə minmiş məhkəmə qərarının bu günədək icra edilmədiyi bildirilir.

Gündəlikxəbər.org xəbər verir ki, 1xeber.media-ya təqdim olunan məhkəmə sənədlərindən görünür ki, Nərimanov Rayon Məhkəməsinin 5 mart 2026-cı il tarixli, 3(5-97)-1158/2026 nömrəli qərarı ilə Fidan Abbasova Azərbaycan Respublikası İnzibati Xətalar Məcəlləsinin 206-cı maddəsində nəzərdə tutulan inzibati xətanı törətməkdə təqsirli bilinib.

Məhkəmənin qərarı ilə onun barəsində 300 manat məbləğində inzibati cərimə tətbiq edilib. Bununla yanaşı, Fidan Abbasovanın ərazi narkoloji dispanserində profilaktik qeydiyyata alınması qərara alınıb.

İş materiallarında olan Səhiyyə Nazirliyinin Respublika Narkoloji Mərkəzinin 5 mart 2026-cı il tarixli, 1857 nömrəli rəyində F.Abbasovadan götürülmüş sidik nümunəsində THC-nin müsbət nəticə göstərdiyi qeyd olunub.

Rəydə Fidan Abbasovanın müayinə zamanı narkomaniya xəstəliyindən əziyyət çəkmədiyi və məcburi müalicəyə ehtiyacının olmadığı bildirilsə də, onun ərazi narkoloji dispanserində profilaktik qeydiyyata alınması məsləhət görülüb.

Nərimanov Rayon Məhkəməsi keçirilmiş testlərin və aparılmış analizlərin nəticələrini iş üzrə digər sübutlarla birlikdə araşdıraraq F.Abbasovanın narkotik vasitədən istifadə etməsi qənaətinə gəlib.

Fidan Abbasova birinci instansiya məhkəməsinin qərarından apellyasiya şikayəti verərək qərarın ləğv olunmasını və inzibati xəta haqqında iş üzrə icraata xitam verilməsini istəyib.

Apellyasiya şikayətində ilkin ekspert rəyinin düzgün olmadığı iddia edilib, sonrakı tarixlərdə təqdim olunan analizlərin isə mənfi nəticə göstərdiyi bildirilib.

Bakı Apellyasiya Məhkəməsi iş üzrə sübutları, müdafiə tərəfinin dəlillərini və Respublika Narkoloji Mərkəzinin nümayəndəsinin mövqeyini araşdıraraq birinci instansiya məhkəməsinin gəldiyi nəticəni qanuni və əsaslı hesab edib.

Apellyasiya instansiyasının qərarında Fidan Abbasovanın istinad edilən inzibati xəta əməlini törətməsinin sübuta yetirildiyi qənaətinə gəlinib.

Bakı Apellyasiya Məhkəməsinin 2 aprel 2026-cı il tarixli, 3(3-6)-885/2026 nömrəli qərarı ilə F.Abbasovanın apellyasiya şikayəti təmin edilməyib, Nərimanov Rayon Məhkəməsinin qərarı isə dəyişdirilmədən saxlanılıb. Apellyasiya Məhkəməsinin qərarının qəti olduğu və ondan şikayət və ya protest verilə bilməyəcəyi göstərilib.

Beləliklə, qanuni qüvvəyə minmiş məhkəmə qərarına əsasən, Fidan Abbasova 300 manat cərimə olunmaqla yanaşı, ərazi narkoloji dispanserində profilaktik qeydiyyata alınmalıdır.

Lakin redaksiyaya daxil olan müraciətdə iddia edilir ki, məhkəmə qərarının mövcud olmasına və narkotik vasitədən istifadə faktının test nəticələri və digər sübutlarla təsdiqlənməsinə baxmayaraq, Fidan Abbasova bu günədək narkoloji dispanserdə qeydiyyata alınmayıb. Bununla da qərarın müvafiq hissəsinin icrasız qaldığı bildirilir.

Sual olunur: Abbasova Fidan Loğman qızının ərazi narkoloji dispanserində profilaktik qeydiyyata alınması barədə qanuni qüvvəyə minmiş məhkəmə qərarı nə üçün bu günədək icra olunmur? Qərarın icrasına hansı qurum cavabdehdir və onun icrasına mane olan səbəb nədir?

İctimaiyyət aidiyyəti dövlət qurumlarından və Fidan Abbasovadan bu suallara aydın və rəsmi cavab gözləyir.

1xeber.media qarşı tərəfin və aidiyyəti dövlət qurumlarının mövqeyini dərc etməyə hazırdır.