25934076 manat vergi borcu olan qurum 10 manatlıq şirkətə 237 min manatlıq tender verib
“İri Şəhərlərin Birləşmiş Su Təchizatı Xidməti” publik hüquqi şəxsin (PHŞ) vergi orqanlarına olan borcu sürətlə artaraq 25 milyon manatı ötüb. 32gun.az-ın əldə etdiyi məlumata görə, qurumun vergi borcu hazırda 25.934.076,46 manat təşkil edir.
32gun.az-ın digər məlumatına görə, sözügedən qurum Oğuz-Qəbələ-Bakı yeraltı suötürücü qurğuların SCADA idarəetmə sisteminin yenidən qurulması üçün tələb olunan mal-materialların satın alınması məqsədilə tender müsabiqəsi keçirib.
Tenderin qalibi “B2B GROUP” Məhdud Məsuliyyətli Cəmiyyəti olub. Tərəflər arasında  237.495,81 manatlıq müqavilə bağlanacağı gözlənilir.
Araşdırmalar nəticəsində məlum olub ki, “B2B GROUP” MMC-nin nizamnamə kapitalı cəmi 10 manatdır, qanuni təmsilçisi isə Ramal Bəşirov Bəşir oğludur.
Maraqlıdır ki, böyük vergi borcuna baxmayaraq, dövlət qurumu yüksək məbləğli tenderləri kiçik nizamnamə kapitalına malik, tanınmayan şirkətlərə verməyə davam edir.
Bildirək ki, vergi borcu ilə bağlı quruma sorğu ünvanlasaq da mətbuat xidməti Ceyhun Musaoğlu suallarımızı cavabsız qoyur.
Qeyd edək ki, “İri Şəhərlərin Birləşmiş Su Təchizatı Xidməti” publik hüquqi şəxsin İdarə Heyətinə rəhbərlik müvəqqəti olaraq Tahir Xəlilova həvalə olunub.(32gun.az)