Bakı şəhərinin ən mühüm və strateji rayonlarından biri olan Nərimanov paytaxtın biznes mərkəzlərinə, universitetlərinə və iri infrastruktur obyektlərinə ev sahibliyi edir. Ancaq bu parıltının arxasında sakinlərin gündəlik həyatına təsir edən ciddi problemlər gizlənir. Təəssüf ki, Elgin Həbibullayevin rəhbərliyi dövründə bu problemlər illərlə yığılıb və hələ də həllini tapmayıb.
Sakinlər uzun müddətdir ki, həyətlərin abadlaşdırılmamasından, binaların baxımsız qalmasından, nəqliyyat sıxlığından, eləcə də məmur-vətəndaş ünsiyyətindəki soyuqluqdan əziyyət çəkirlər. Daha acınacaqlısı isə odur ki, ən sadə məsələlər belə diqqətsiz qalır.
Zibil qutularının vaxtında boşaldılmaması, köhnəlmiş asfalt örtüyü, məhəllələrin işıqsız və baxımsız qalması adi texniki qüsurlar deyil – bunlar insanların gündəlik rahatlığını birbaşa pozan problemlərdir. Lakin rayon rəhbərliyi bu məsələləri görməzlikdən gəlir, daha çox "gözə görünən” formal işlərlə kifayətlənir.
Vətəndaşların icra nümayəndələrinin qəbuluna düşməsi isə demək olar ki, mümkünsüzdür. İnsanların müraciətləri ya cavabsız qalır, ya da üzərindən formallıqla keçilir. Bu vəziyyət sakinləri məcbur edir ki, problemlərini sosial şəbəkələrdə səsləndirsinlər. Bir sözlə, yerli hakimiyyət vətəndaşla üzbəüz ünsiyyətdən qaçır.
Şəffaflıqdan danışmaq isə ümumiyyətlə mümkün deyil. Rayonun inkişafı ilə bağlı nə bir konkret proqram, nə də illik fəaliyyət planı ictimaiyyətə açıqlanır. Bu, təkcə idarəçilik boşluğu deyil, həm də insanların etimadına açıq-aşkar hörmətsizlikdir.
Elgin Həbibullayevin fəaliyyəti ilə bağlı əsas tənqid – onun ictimaiyyət qarşısında hesabatlı olmamasıdır. Nərimanov rayonunun problemləri barədə nə açıq müzakirə aparılır, nə də görülən işlərin nəticələri paylaşılır. Hesabatlılıqdan qaçan rəhbərlik sadəcə məsuliyyətdən yayınmaqla məşğuldur.
Strateji əhəmiyyətli bir rayonda sakinlərin ən sadə sosial problemlərinin belə həll olunmaması, rəhbərliyin bacarıqsızlığının açıq göstəricisidir. Elgin Həbibullayev formal tədbirlərlə və görüntü naminə işlərlə kifayətlənir.
Rayon sakinləri isə artıq susmur – onlar problemlərini açıq şəkildə dilə gətirir və dəyişiklik tələb edirlər. Çünki Nərimanov rayonu "vitrin” üçün yox, burada yaşayan insanlar üçün abad və rahat olmalıdır.
"Azərbaycan Reallığı” yazıda adı çəkilən bütün şəxslərin mövqeyini işıqlandırmağa açıqdır.
"Azərbaycan Reallığı”