Azərbaycan Dövlət Su Ehtiyatları Agentliyinə tabeli “Regional Su Meliorasiya Xidməti” tərəfindən keçirilmiş açıq tenderlərə yekun vurulub. Dövlət satınalmalarının portalına yerləşdirilmiş məlumatlara görə “Regional Su Meliorasiya Xidməti” 03.09.2025-ci ildən 23.09.2025-ci ilə qədər keçirilmiş 28 açıq tenderdə “AZSUR GROUP” Məhdud Məsuliyyətli Cəmiyyətini qalib seçib.

Qeyd edək ki, “AZSUR GROUP” MMC “Regional Su Meliorasiya Xidməti”ndən 23.09.2025-ci ildə 7 açıq tender, 12.09.2025-ci ildə 11, 12.09.2025-ci ildə isə 7 açıq tenderin qalibi olub. onlardan bir neçəsinə diqqət yetirək.

Torpaq məcralı Malikumudlu kanalının (PK 19+00÷PK 29+00,L=1,0 km) beton üzlüyə alınması və üzərindəki qurğuların əsaslı təmiri üzrə açıq tender 11.09.2025-ci ildə yekunlaşıb və 295.181,61 manat məbləğində müqavilənin bağlanılması gözlənilir.

Əhmədalılar Haramı beton kanalının (PK26+00-PK 35+00, L= 900 m) beton üzlüyünün üzərindəki qurğularla birlikdə əsaslı təmiri üzrə açıq tender 11.09.2025-ci ildə yekunlaşıb və 217.415 manat məbləğində müqavilənin bağlanılması gözlənilir.

Torpaq məcralı Nadirşah kanalının (PK 99+00-PK104+00, L=500 m) beton üzlüyə alınması və üzərindəki qurğularla birlikdə əsaslı təmiri üzrə açıq tender 12.09.2025-ci ildə yekunlaşıb və 189.804,41 manat məbləğində müqavilənin bağlanılması gözlənilir.

Torpaq məcralı Zülfəli kanalının (PK 00+00-PK 10+00 (L=1 km) beton üzlüyə alınması üzrə açıq tender 12.09.2025-ci ildə yekunlaşıb və 189.744 manat məbləğində müqavilənin bağlanılması gözlənilir.

3 aqreqatlı 1 saylı tərpənməz nasos stansiyasının təzyiqli boru xəttinin (D=900mm,L=450 m) əsaslı təmiri üzrə açıq tender 23.09.2025-ci ildə yekunlaşıb və 276.710 manat məbləğində müqavilənin bağlanılması gözlənilir.

S -1-3 (LR-80 nov kanalının (PK 4+00+PK 30+6(h L=2,66 km) üzərindəki qurğularla birlikdə əsaslı təmiri üzrə açıq tender 23.09.2025-ci ildə yekunlaşıb və 363.558 manat məbləğində müqavilənin bağlanılması gözlənilir.

Axiya sarvanı kanalının beton üzlüyə alınması (PK18+48-PK38+48) (L=2000m) üzrə açıq tender 23.09.2025-ci ildə yekunlaşıb və 208.270 manat məbləğində müqavilənin bağlanılması gözlənilir.

Göründüyü kimi “AZSUR GROUP” Məhdud Məsuliyyətli Cəmiyyətini qalib seçildiyi bu tenderlərin hərəsi bir rayonda həyata keçiriləcək işlərlə bağlıdır. Məsələn, Malikumudlu kanalı Zərdab rayonunda, Əhmədalılar Füzuli rayonunda, ı Zülfəli kanalı Ağdaş rayonunda, Mərzəndiyə kanalı Şamaxı rayonunda, Qandax kanalı Zaqatala rayonunda, “Qızıl-Nohur nasos stansiyası Abşeron rayonunda, Muğan kanalı İmişli, Saatlı və Sabirabad rayonlarında, Ağalıq-1 kanalı Şabran rayonunda, Həmzəlli kəndi Qəbələ rayonunda, Quşqara kəndi Göygöl rayonunda, Tuğ suvarma kanalı Xocavənd, Qarayeri Samux rayonunlarında yerləşir.

Bəs “AZSUR GROUP” Məhdud Məsuliyyətli Cəmiyyəti bu dövlət sifarişlərini eyni vaxtda, ayrı-ayrı rayonlarda yerinə yetirmək iqtidarındadırmı?

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “AZSUR GROUP” (VÖEN: 1503949491) Məhdud Məsuliyyətli Cəmiyyətinin 21.02.2018 il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının, BAKI ŞƏHƏRİ, NƏRİMANOV RAYONU, ƏHMƏD RƏCƏBLİ, ev.21F, m.21F, qanuni təmsilçisi kimi isə İmanlı Rəşad Yasəf oğlu qeyd olunub. MMC-nin təsisçisi və ilk qanuni təmsilçisi Musayev Sərxan Mətləb oğlu olub.

“Lisenziyalar və İcazələr haqqında” Azərbaycan Respublikası Qanununun 8.1 maddəsinə uygun olaraq İqtisadiyyat Nazirliyi tərəfindən aparılan lisenziyaların və icazələrin vahid reyestrində MMC -nin tikintisinə icazə tələb olunan bina və qurğuların tikinti-quraşdırma işləri üzrə lisenziya alması barədə məlumat var. MMC 02.05.2024-cü ildə yanğından mühafizə sistemlərinin və vasitələrinin quraşdırılması, texniki xidməti və təmiri üzrə, 02.05.2024-cü ildə Qaldırıcı qurğuların, metallurgiya avadanlığının, təzyiq altında işləyən qazanların, tutumların quraşdırılması və təmiri üzrə, 06.05.2024-cü ildə təhlükə potensiallı obyektlərdə istismar olunan avadanlığın və texniki qurğuların diaqnostikası və digər texniki yoxlamaların keçirilməsi üzrə lisenziyalar alıb.

Rəsmi dövlət qurumlarının məlumatlarından da göründüyü kimi “AZSUR GROUP” Məhdud Məsuliyyətli Cəmiyyəti 02.05.2024-cü ildə yanğından mühafizə sistemlərinin və vasitələrinin quraşdırılması, texniki xidməti və təmiri üzrə ilk lisenziya alıb. MMC-yə 08.08.2025-ci ildə isə meliorasiya qurğularının layihələndirilməsi üzrə lisenziya verilib.

Bütün bunlara baxmayaraq, “Regional Su Meliorasiya Xidməti” son 20 gün ərzində “AZSUR GROUP” Məhdud Məsuliyyətli Cəmiyyətini 28 açıq tenderdə qalib seçib. Bu tenderlərin ümumi dəyəri 20 milyon manatdan çoxdur. Qeyd edək ki, “AZSUR GROUP” MMC yalnız sentyabr ayının 1-dən bu günə qədər 33 açıq tenderin qalibi seçilib. Maraqlıdır bu MMC-nin nə qədər işçi qüvvəsi var və eyni vaxtda bu işləri necə həyata keçirəcək.

Qeyd edək ki, “Regional Su Meliorasiya Xidməti” Dövlət Su Ehtiyatları Agentliyinə tabeli publik hüquqi şəxsi kimi əvvəlki “Meliorasiya və Su Təsərrüfatı” ASC-nin varisidir. Regional Su Meliorasiya Xidmətinin rəisi isə uzun illər Meliorasiya və Su Təsərrüfatı Açıq Səhmdar Cəmiyyəti sədrinin müavini olmuş Zakir Quliyevdir. O, bu vəzifəyə Azərbaycan Dövlət Su Ehtiyatları Agentliyinin sədri Zaur Mikayılovun əmri ilə 26.06.2024-cü ildə təyin edilib.(Aktualinfo.org)