Bir neçə gün öncə Prezident İlham Əliyev açıq şəkildə bildirdi ki, dövlət xidmətlərində pərakəndəliyə son qoyulmalı, bütün xidmətlər vahid platforma – myGov üzərində cəmlənməlidir.

Dövlət başçısı qurumların qarşısında konkret tələb qoydu ki, paralel platformalar və mobil tətbiqlər mərhələli şəkildə ləğv edilməlidir. Prezidentin bu mövqeyi həm büdcə vəsaitlərinin israfının qarşısını almaq, həm də dövlət idarəçiliyindəki texnoloji xaosu bitirmək məqsədi daşıyır. Ölkə rəhbəri bu pərakəndəliyi tənqid edərək vurğulamışdı: "Hər bir qurum özü üçün ayrıca resurs yaradır, sonra da bu resursların idarə edilməsi üçün əlavə vəsait tələb olunur. Buna son qoyulmalıdır. Vətəndaş müxtəlif qapılara döyməməlidir, onun bircə rəqəmsal giriş nöqtəsi olmalıdır – o da myGov-dur".

Lakin bu tapşırıqdan nəticə çıxarmayan qurumlar da var. AFN.az xəbər verir ki, Fövqəladə Hallar Nazirliyi (FHN) yeni “e-FHN” mobil tətbiqinin istifadəyə verildiyini və xidmətlərin məhz oradan göstərilməyə başlandığını elan edib. Azərbaycan İnternet Forumunun rəhbəri Osman Gündüz FHN-in bu addımını "təəccüblü" adlandırıb. Onun sözlərinə görə, bu yanaşma Prezidentin ortaya qoyduğu vahid rəqəmsal vitrin prinsipinə açıq-aşkar ziddir:

"Əgər bu praktika davam edərsə, myGov-un vahid mərkəz rolu formal xarakter daşıyacaq. Üstəlik, bir qədər axtarış etdikdə bəzi saytlardan bu xəbərin sonradan silindiyi də görünür. Ümid edirəm ki, rəsmi təkzib verilər".

O.Gündüz qeyd edib ki, on illərdir yazılmasına və səsləndirilməsinə baxmayaraq, Azərbaycan hələ də “112 Mobil Xilasedici” tipli milli fövqəladə xəbərdarlıq və ilkin yardım resursuna malik deyil: "Nəhəng resurslara sahib FHN bu son dərəəcə vacib sistemi indiyədək yarada bilməyib. Prezidentin müşavirədə dediyi 'Dövlət vəsaiti səmərəli xərclənməlidir, real nəticə verən layihələrə üstünlük verilməlidir' fikri birbaşa bu növ effektivsizliyə ünvanlanmışdı. Hətta xatırlayıram ki, yaxın keçmişdə Azərbaycan vətəndaşlarına zəlzələ xəbərdarlığı mesajını da bir neçə dəfə FHN yox, Google göndərmişdi. İctimai və strateji əhəmiyyət daşıyan bu problemlər həllini gözlədiyi halda, FHN-nin ilin bu vaxtında yeni xidmət tətbiqi təqdim etməsi ciddi suallar doğurur".

AFN.az