Son günlər Türkiyədə bəzi media qurumları və sosial şəbəkə hesabları tərəfindən Azərbaycan və Prezident İlham Əliyev əleyhinə təhqiramiz və qarayaxma xarakterli paylaşımlar yayılır.

BTV xəbər verir ki, xüsusilə Azərbaycanın İstanbul şəhərindəki Baş Konsulluğu qarşısında keçirilən etiraz aksiyasından sonra sosial şəbəkələrdə Azərbaycan-Türkiyə münasibətlərinə zərər vura biləcək çoxsaylı paylaşımlar yayılıb.

Paylaşımlarda Azərbaycan xalqına qarşı təhqiramiz ifadələr işlədilir, Prezident İlham Əliyev hədəfə alınır və Türkiyənin Qarabağ müharibəsində Azərbaycana verdiyi dəstək müxtəlif formada təhrif olunur.

BTV-nin təsisçisi Sahil İmanov məsələ ilə bağlı bu paylaşımların mənbəyinin müəyyənləşdirilməsi üçün Türkiyədə fəaliyyət göstərən aparıcı rəqəmsal araşdırma şirkətlərindən birinə müraciət edib.

Araşdırma nə göstərib?

Aparılan mənbə analizində Azərbaycan əleyhinə paylaşımlar edən bir sıra sosial media hesablarının fəaliyyətində oxşar xüsusiyyətlərin olduğu müəyyən edilib.

Eyni və ya bir-birinə çox yaxın məzmunlu paylaşımların müxtəlif hesablar tərəfindən qısa müddət ərzində yayılması, hesabların fəaliyyət xüsusiyyətləri və paylaşım ardıcıllığı araşdırılıb.

Araşdırmanın ilkin nəticələrinə əsasən, bu hesabların bir hissəsinin real istifadəçilərdən çox koordinasiyalı və bot xarakterli fəaliyyət göstərən hesablar ola biləcəyi bildirilir.

Yəni sosial şəbəkələrdə çoxsaylı hesabların eyni fikri yayması həmin fikrin avtomatik olaraq Türkiyə cəmiyyətinin mövqeyi olduğu anlamına gəlmir.

Paylaşımların siyasi istiqaməti diqqət çəkir

Araşdırmada diqqət çəkən əsas məqamlardan biri isə Azərbaycan əleyhinə paylaşımların müəyyən siyasi çevrələrlə mümkün əlaqəsinin araşdırılması olub.

BTV-nin əldə etdiyi ilkin məlumatlara əsasən, sözügedən paylaşımların bir hissəsinin Özgür Özəl və onun rəhbərlik etdiyi YENİ Parti ətrafında fəaliyyət göstərən sosial media şəbəkələri ilə əlaqəsinin olmasıdır.

Bu araşdırmanın nəticələri əsasında belə bir sual yaranıb:

Azərbaycan və Prezident İlham Əliyev əleyhinə aparılan bu kampaniya müəyyən siyasi qruplar tərəfindən təşkil olunurmu?

Hazırkı mərhələdə bu suala qəti hüquqi cavab vermək mümkün deyil. Lakin BTV-nin apardığı mənbə analizi belə bir əlaqənin araşdırılmasına əsas verən rəqəmsal izlərin olduğunu göstərir.Məqsəd nə ola bilər?

BTV-nin araşdırmasına görə, belə kampaniyaların əsas nəticəsi Azərbaycan və Türkiyə xalqları arasında qarşıdurma görüntüsü yaratmaqdır.

Azərbaycan-Türkiyə münasibətləri yalnız siyasi münasibətlərdən ibarət deyil. İki ölkə arasında tarixi, mədəni, milli və hərbi bağlar mövcuddur.

Bu baxımdan sosial şəbəkələrdə “azərbaycanlılar türklərin düşmənidir”, “Azərbaycan Türkiyənin yaxşılığını qiymətləndirmədi” və buna bənzər fikirlərin kütləvi şəkildə yayılması iki ölkənin ictimaiyyətləri arasında narazılıq yaratmağa xidmət edə bilər.

Xüsusilə Qarabağ məsələsində Türkiyənin Azərbaycana verdiyi siyasi və mənəvi dəstəyin qarşıdurma predmetinə çevrilməsi diqqət çəkir.

Şamil Ayrım BTV-yə danışdı

Məsələ ilə bağlı Türkiyə-Azərbaycan Parlamentlərarası Dostluq Qrupunun sədri, Türkiyə Böyük Millət Məclisinin deputatı Şamil Ayrımla əlaqə saxladıq.

Şamil Ayrım BTV-nin təsisçisi Sahil İmanova açıqlamasında Azərbaycan və Türkiyə arasındakı münasibətlərin sosial şəbəkələrdə fəaliyyət göstərən ayrı-ayrı şəxslər tərəfindən pozula bilməyəcəyini bildirib.

Şamil Ayrım deyib:

“Azərbaycan-Türkiyə münasibətləri bir-iki trolun poza biləcəyi münasibətlər deyil. Biz qan qardaşıyıq, din qardaşıyıq, soyumuz birdir. Biz həqiqi qardaşıq. Bu qardaşlıq dünənin, bugünün deyil, əbədi və sarsılmazdır.”

Türkiyəli deputat həmçinin BTV-nin apardığı araşdırmanın nəticələri barədə Türkiyənin aidiyyəti qurumlarına və İnformasiyaNazirliyinə məlumat verəcəyini bildirib.

Türkiyə xalqının mövqeyi bir neçə hesabla müəyyən edilmir

Sosial şəbəkələrdə Azərbaycan əleyhinə yazılan hər bir paylaşımı Türkiyə xalqının mövqeyi kimi təqdim etmək doğru deyil.

Əgər müəyyən hesabların bot və ya saxta hesab olduğu texniki araşdırma nəticəsində təsdiqlənərsə, həmin hesabların yaydığı fikirlər milyonlarla Türkiyə vətəndaşının mövqeyi kimi qəbul edilə bilməz.

Azərbaycan və Türkiyə xalqları arasında mövcud münasibətlər sosial şəbəkələrdə yaradılan süni qarşıdurmalardan daha böyük və daha möhkəm təmələ malikdir.Araşdırma davam etdiriləcək

BTV Azərbaycan və Prezident İlham Əliyev əleyhinə yayılan bu paylaşımların mənbəyini araşdırmaqda davam edəcək.

Əgər aparılan texniki araşdırmalar nəticəsində konkret şəxslərin, siyasi qurumların və ya digər təşkilatların bu kampaniyada iştirakını təsdiqləyən yeni sübutlar əldə olunarsa, BTV həmin məlumatları da ictimaiyyətə təqdim edəcək.

Eyni zamanda, adı çəkilən şəxslərin və siyasi qurumların mövqeyi də BTV tərəfindən öyrəniləcək.

Azərbaycan və Türkiyə qardaşlığı sosial şəbəkələrdə yaradılan süni qarşıdurmalardan daha güclüdür.