"AzInTelecom” Məhdud Məsuliyyətli Cəmiyyəti cari ilin yanvar ayının 22-də sifarişçi olduğu növbəti satınalmaya yekun vurub.

Qlobal.az xəbər verir ki, "AzInTelecom” MMC-nin "Müəssisə daxili tədbirlərin təşkili xidmətlərinin satın alınması" lotu üzrə yekun vurduğu satınalmada "LAGUNA GROUP" Məhdud Məsuliyyətli Cəmiyyəti (VÖEN: 1004604201) qalib elan edilib.

Tenderin smetası 179.733 manat təşkil edir.

"LAGUNA GROUP" MMC 2017-ci ildə təsis edilib. Şirkətin hüquqi ünvanı Binəqədi rayonu, Əcəmi Naxçıvanı ev 27, mənzil 102 ünvanı, qanuni təmsilçisi Əsgərov Ramil Əsgər oğludur.

Müqaviləyə görə "LAGUNA GROUP" MMC "AzInTelecom” MMC-nin bir neçə tədbirini təşkil edəəck. Bu tədbirlərin sırasında Liderlik bacarıqlarının inkişafı ilə bağlı komanda quruculuq tədbiri, Uşaqlar günü, Maraqlar klubu, Müəssisə daxili tədbir - Ramazan bayramında iftar süfrəsi, Voleybol, Bouling yarışları, Tədbirlər üçün hədiyyə kartları, Azgranata şirkətinin üzüm bağlarına ekskursiya və s. yer alır.

Qalib elan edilən "LAGUNA GROUP" MMC-nin fəaliyyət profili, lisenziyaları, maddi texniki bazası barədə açıq internet resurslarında məlumatlara rast gəlinmir.

Məlumata görə "LAGUNA GROUP" MMC nazir müavini vəzifəsində çalışan Yalçın Rəfiyevin qardaşına məxsusdur.

Yalçın Rəfiyev

"LAGUNA GROUP" MMC-nin hüquqi ünvanında - Binəqədi rayonu, Əcəmi Naxçıvanı ev 27, mənzil 102 - də daha bir şirkət qeydiyyata alınıbdır. "My Vings” MMC (VÖEN – 1002351891) adlı bu şirkətin qanuni təmsiçisi nazir müavini Yalçın Rəfiyevin qardaşı Rəfiyev Müzadil İlqar oğludur.

Qeyd edək ki, "AzInTelecom” MMC Rəqəmsal İnkişaf və Nəqliyyat Nazirliyinin nəzdində fəaliyyət göstərir.

"AzInTelecom” MMC-nin İdarə Heyətinin sədri Elxan Əzizovdur. Elxan Əzizov 2022-ci ildə bu vəzifəyə təyin edilib.

Şirkətin fəaliyyət istiqamətləri bulud həlləri, Azərbaycan və xarici ölkələr arasında mübadilə olunan Beynəlxalq səs trafiki, Biznes həlləri, İnformasiya Təhlükəsizliyi xidmətləri, SİMA rəqəmsal həllər platforması və Mərkəzləşdirilmiş informasiya sistemlərindən ibarətdir.

Qlobal.az nazir müavinin qardaşının şirkəti ilə eyni hüquqi ünvanda olan şirkətin qalib elan edilməsi məsələsi ilə bağlı "AzInTelecom” MMC-dən möve öyrənib.

Açıqlamada deyilir:

"2024-cü il yanvarın 1-dən qüvvəyə minən "Dövlət satınalmaları haqqında” Azərbaycan Respublikasının Qanununa (budan sonra - Qanun) əsasən Azərbaycan Respublikasının beynəlxalq öhdəlikləri ilə nəzərdə tutulduğu və ya dövlət təhlükəsizliyi baxımından müəyyən xarici təchizatçıların və ya müəyyən ölkələrdən (o cümlədən Azərbaycan Respublikasının diplomatik əlaqələri olmadığı ölkələrdən) olan xarici təchizatçıların satınalmada iştirak etməsinə məhdudiyyətlər qoyulduğu hallar istisna olmaqla, istənilən rezident və qeyri-rezident təchizatçı Azərbaycan Respublikasında keçirilən satınalmalarda iştirak edə bilər. Qanuna uyğun olaraq təchizatçıların uyğunluq göstəriciləri təchizatçılara dair ümumi və xüsusi tələblərdən ibarətdir. Təchizatçıların uyğunluq göstəricilərinə dair tələblər şərtlər toplusunda ətraflı izah olunur və bütün təchizatçılara eyni dərəcədə şamil edilir. Həmçinin, Qanunun 8-ci maddəsinə əsasən satınalan təşkilat qanunvericilikdə öz əksini tapmış istisna hallarını nəzərə almaqla (məhkəmənin, nəzarət orqanının, Azərbaycan Respublikasının Hesablama Palatasının və müvafiq icra hakimiyyəti orqanının müəyyən etdiyi orqanın (qurumun) qanunla müəyyən edilmiş hüquq və vəzifələrinin icrası ilə bağlı məlumatların açıqlanması halları), təchizatçıların kommersiya sirri təşkil edən və ya qanunla qorunan digər məlumatlarını açıqlamır və onları məxfi (konfidensial) saxlayır. Əlavə olaraq qeyd etmək istərdik ki, Qanunun 14-cü maddəsinə əsasən satınalan təşkilatlardan və təchizatçılardan keçirilən satınalma proseduru ilə əlaqəli sənədləri (məlumatları) tələb etmək və təkliflərin yenidən qiymətləndirilməsi və ya satınalmanın ləğv edilməsi barədə qərar qəbul etmək səlahiyyətlərini satınalma sahəsində dövlət nəzarətini nəzarət orqanı həyata keçirir".

Cahandar Laçınlı

Qlobal.az