Son bir neçə ildir ki, ölkəmizin şəhər və rayonlarında, digər ərazilərində həyata keçirilən qanunsuz tikinti işləri tam əksəriyyəti narahat etməkdədir və bu problemin varlığı, hal-hazırda ölkə gündəmini zəbt edən əsas mövzulardan biri hesab olunur. Baxmayaraq ki, ölkə rəhbəri İlham Əliyev bir çox müşavirələrdə qanunsuz tikinti işlərinə xüsusi diqqət yetirir və vəzifə sahibi olan hər kəsə bu yöndə ciddi tapşırıqlarını verir.

Qeyd edək ki, 09 oktyabr 2018-ci il tarixdə Nazirlər Kabinetinin geniş iclası keçirilir və Prezident İlham Əliyev paytaxt Bakı şəhərində, digər şəhər və rayonlarda həyata keçirilən qanunsuz tikinti işləri ilə bağlı iclasda iştirak edən hər kəsə ciddi tapşırıqlarını verir. Prezident tikinti işləri ilə bağlı Sərəncam imzaladığını iclas iştirakçılarının bir daha diqqətinə çatdırır və onu da vurğulayır ki, “Tikinti işləri Dövlət Şəhərsalma və Arxitektura Komitəsinin icazəsi olmadan həyata keçirilə bilməz. Əgər kimsə verilmiş qaydaları pozarsa, o halda qaydanı pozanlar həm cinayət məsuliyyətinə cəlb olunacaqlar, həm də qanunsuz inşa olunan tikililər dərhal söküləcək”.

Təəssüflər olsun ki, ölkə başçısı səviyyəsində vəzifə sahibi olan hər kəsə ciddi tapşırıqlar verilsə də, hal-hazırda Sumqayıt şəhəri, 6-cı mikrorayon ərazisindəki məscidə yaxın sahədə, daha dəqiq desək 27-ci və 30-cu binaların həyətində “Yusif-2014” MTK-nın rəhbərliyi primitiv qaydada tikinti işlərini davam etdirməkdədir. GundemXeber.Az-a daxil olan məlumatlar əsasında əməkdaşlarının apardığı araşdırmalardan məlum oldu ki, həmin ərazi bina sakinlərinin istirahət etmələri, gəzmələri, oturub söhbət etmələri və s. üçün nəzərdə tutulsa da, “Yusif-2014” MTK bir növ həmin ərazini “işğal edir” və bina sakinlərini çətin duruma salır. Ərazidə olan çəkliş qrupumuzun əldə etdiyi məlumatlara görə, qeyd olunan ərazidə əvvəllər az-çox yaşıllıqlar olsa da, MTK-nin rəhbərliyi işə başlayarkən həmin yaşıllığı məhv edir.

Ümumi görüntülərdən də görünür ki, hal-hazırda həmin tikilinin ətrafında bir neçə yaşıl ağac qalıb və yəqin ki, yaxın vaxtlarda onların da ömür yollarına “xətt çəkiləcək”.
Bu da onu göstərir ki, Yusif-2014” MTK-nın rəhbərliyi nə tikinti işləri haqqında təlimatı, nə də ki, ölkə rəhbərinin verdiyi tapşırıqları saya salmır. O halda ortaya belə bir sual çıxır ki, görəsən bu MTK-nın rəhbərliyini durdurmaq üçün daha hansı sərəncam imzalanmalıdır, daha hansı tapşırıqlar verilməlidir? Yaxud da, daha hansı qanun qəbul olunmalıdır ki, Yusif-2014” MTK-nın rəhbərliyi “bəd işlər”indən əl çəksin? Mövzuya qayıdacağıq.

GundemXeber.Az