"Binəqədi rayonu 10 nömrəli şəhər poliklinikasında travmatoloq yoxdur. Zədəli insan 10 nömrəli poliknikaya gəlməli, tibbi kitabçasını götürüb, 25 nömrəli poliklinikaya yollanmalı, ucsuz-bucaqsız qeydiyyat növbəsindən sonra saatlarla həkimin qəbuluna düşmək üçün gözləməlidir... Hələ kitabçanı geri qaytarmaq da var..." "Dia.az" xəbər verir ki, bunu öz gileyində telejurnalist Sevinc Süleymanova qeyd edib.

O daha sonra fikrini belə əsaslandırır: "Vəziyyəti ağır olan xəstələr üçün isə yaxınları əziyyət çəkməli olur. Eyni prosesi icra edərək, 35 manat ödəyib həkimi evə çağırmalıdırlar...

Bu arada, bülleten də ancaq üç günlük verilir, zədəniz sağalana, əmək qabiliyyətiniz bərpa olunana kimi eyni proses mütəmadi təkrarlanmalıdır.

Minlərlə vətəndaşa xidmət edən poliklinikaya bir travmatoloq tapmaq bu dərəcədə fantastikdir ki, canı ağrıyan insanlar bu qədər əziyyət çəkməyə məcbur edilir?"

Dia.az