Venesuela prezidenti Nikolas Maduro ABŞ-ni “yeni müharibəyə zəmin hazırlamaqda” ittiham edib.

Maduro bəyanatını ABŞ-nin ən böyük hərbi gəmisini Karib dənizinə göndərməsinə cavab olaraq verib.

"USS Gerald R. Ford" gəmisi göyərtəsində 90-a qədər hərbi təyyarə daşıya bilir.

“O​nlar bir daha müharibəyə başlamayacaqlarına söz vermişdilər, amma indi yeni müharibə uydururlar", - Maduro dövlət mediasında yayımlanan müraciətində bildirib.

ABŞ narkotik qaçaqmalçılığına qarşı müharibə adlandırdığı əməliyyat çərçivəsində bölgədəki gəmilərə son həftələrdə 10 hava zərbəsi endirib.

ABŞ prezidenti Donald Tramp Maduronu narkotik qaçaqmalçılığı təşkilatının rəhbəri olmaqda ittiham edib, Maduro isə bunu inkar edir. Venesuelada ABŞ-nin bölgədə hərbi qüvvələri artırmasının Maduronu hakimiyyətdən devirmək məqsədi daşıdığına dair narahatlıqlar var.

ABŞ Maduronu Venesuelanın legitim rəhbəri kimi tanımayan bir çox ölkədən biridir. Bu ölkədə ən son ötən il keçirilən prezident seçkilərinin nəticələri ABŞ də daxil olmaqla bir çox ölkə tərəfindən tanınmayıb. Müxalifətin səs hesablamaları göstərib ki, onların namizədi böyük fərqlə qələbə qazanıb.

Bununla belə, Venesuela regionun narkotik ticarətində nisbətən kiçik rol oynayır.

ABŞ-nin Müdafiə Departamentindən oktyabrın 24-də bildirilib ki, "USS Gerald R. Ford" aviadaşıyıcısı ABŞ-nin Cənub Komandanlığının məsuliyyət sahəsinə göndəriləcək, bu əraziyə isə Mərkəzi və Cənubi Amerika, həmçinin Karib dənizi daxildir.

Əlavə qüvvələr “narkotik qaçaqmalçılığını pozmaq və transsərhəd cinayət təşkilatlarını zəiflətmək və dağıtmaq üçün mövcud imkanları gücləndirəcək və artıracaq”, - deyə bəyanatda vurğulanır.

Tramp Venesuelada quru əməliyyatı keçirmək ehtimalını da dəfələrlə gündəmə gətirib və ötən həftənin əvvəlində bildirib ki, “dənizi artıq tam nəzarət altına aldıqdan sonra indi quruya baxırıq”.

“Bütün narkotiklərin dəniz vasitəsilə daxil olmasının qarşısını aldıq. Çox qısa zamanda bütün narkotiklərin quru vasitəsilə daxil olmasının qarşısını da alacağam. Bunu görməyə başlayacaqsınız", – o, oktyabrın 25-də Ağ Evdə jurnalistlərə bildirib.

ABŞ, həmçinin, bölgədə hava qüvvələrini də gücləndirib.