“Bakı şəhəri Xətai rayonu Rüfət Məmmədov adına 269 nömrəli tam orta məktəbdə şagirdlərdən və müəllimlərdən hicablarını açmaq tələb olunur”
Bu sözləri Yeniavaz.com-a müraciət edən sözügedən məktəbin müəllimləri və bəzi şagirdlərin valideynləri bildiriblər.
Onların sözlərinə görə, məktəbdə yoxlama aparıldıqdan sonra vəziyyət daha da sərtləşib:
“Məktəbə üçüncü gün yoxlama gəlib. Yoxlama adı ilə gələn şəxslər direktora bildiriblər ki, hicablı şagirdlər müəyyən edilmiş məktəbli formasına uyğun deyil və onlara göstərilən formada gəlmələri tapşırılmalıdır”.
Məsələ ilə ünvanladığımız sorğuya məktəbdən verilən cavabda bildirilib ki, 269 nömrəli tam orta ümumtəhsil məktəbində müəllimlər iş zamanı geyim qaydalarına əməl etməlidirlər:
“Təhsilverənlərin etik davranış qaydaları”na əsasən, müəllimin xarici görünüşü və geyimi çalışdığı təhsil müəssisəsinin daxili nizam-intizam qaydalarına uyğun olmalıdır”.
Bildirilib ki, məktəbdə vahid geyim qaydalarına riayət olunması tövsiyə edilir:
“Həmçinin, 269 nömrəli məktəbin Pedaqoji Şurası tərəfindən valideynlərin rəyi nəzərə alınaraq dörd geyim nümunəsindən biri (ağ və tünd göy rənglərdə) seçilib. Valideynlərə və müəllimlərə tövsiyə olunur ki, məktəbdaxili nizam-intizam qaydalarına hörmətlə yanaşsınlar”.
Mövzu ilə bağlı Yeniavaz.com-a danışan hüquqşünas Ramil Süleymanov bildirib ki, məktəbdə vahid geyim formasının tətbiqi zamanı baş örtüyü məsələsinə diqqət yetirilməlidir:
“Dövlət bu məsələdə vətəndaşların seçimlərinə hörmətlə yanaşmalıdır. Bu, Azərbaycan Respublikasının Konstitusiyası, eləcə də Avropa İnsan Hüquqları Konvensiyasının 9-cu maddəsi ilə tənzimlənir. Buna görə bir sıra qərarlar mövcuddur ki, Avropa İnsan Hüquqları Məhkəməsi şəxsin baş örtüyü ilə məktəbə buraxılmamasını pozuntu hesab etmişdir və bu, təhsil hüququnun pozulması ilə nəticələnir”.
Ramil Süleymanov qeyd edir ki, məktəbdə müəllimlərə hicabın qadağan olunması isə birbaşa şəxsi həyatın toxunulmazlığı hüququnun pozulmasıdır:
“Çünki bəzi insanlar hicabdan geyim aksessuarı kimi istifadə edir, bəziləri isə sırf dini baxışlarına görə. Bununla bağlı Avropa İnsan Hüquqları Məhkəməsinin kifayət qədər keysləri mövcuddur. Elə keyslər var ki, orada pozuntu tanınıb, elələri də var ki, orada pozuntu tanınmayıb. Mən hesab edirəm ki, müəllimlərin geyim məsələsində pozuntu tanına bilər. Çünki müqavilə bağlanarkən əgər işçiyə bununla bağlı xəbərdarlıq olunmayıbsa və sonradan tətbiq olunubsa, bu artıq pozuntu hesab olunur”.
Məlumat üçün bildiririk ki, Azərbaycan Respublikasının Konstitusiyasının 18-ci maddəsinə əsasən dövlət və təhsil sistemi dünyəvi xarakter daşıyır.
Bununla yanaşı, “Ümumi təhsil haqqında” Qanunda qeyd olunur ki, ümumi təhsil müəssisələrində təhsilalanlar üçün geyim formalarını dövlət müəyyənləşdirir.
Qanunda, həmçinin bildirilir ki, dövlət ümumi təhsil müəssisəsində təhsilalanlar üçün təsvirləri müvafiq icra hakimiyyəti оrqanının müəyyən etdiyi orqan (qurum) tərəfindən müəyyən olunmuş geyim formaları tətbiq edilir.
“Dövlət ümumi təhsil müəssisəsi təhsilalanlarının geyim formalarının təsvirləri”nin təsdiq edilməsi haqqında Azərbaycan Respublikası Nazirlər Kabinetinin müvafiq Qərarında isə təhsilalanların geyim formasında hicab nəzərdə tutulmayıb.

Yeniavaz.com