Gündəlikxəbər.org Serhedaz.az-ın məqaləsini təqdim edir:

Serhed.Az olaraq Şuşada tarixi və təbii əhəmiyyət daşıyan qayaların üzərinə müxtəlif ad və yazıların həkk edilməsi ilə bağlı görüntüləri diqqətə çatdırırıq.

Şuşa hər bir azərbaycanlı üçün adi bir şəhər deyil. Bu torpağın azadlığı uğrunda yüzlərlə hərbçimiz canından keçib, şəhidlik zirvəsinə ucalıb. Bu gün həmin əraziləri ziyarət edən insanların ən azı tarixi məkana və şəhidlərimizin əziz xatirəsinə hörmətlə yanaşması gözləniləndir.

Lakin bəzi şəxslərin qayaların üzərinə adlarını yazması və tarixi ərazilərin görünüşünü dəyişdirməsi ciddi suallar doğurur.

İnsan öz adını Şuşanın qayasına yazmaqla nə əldə edir?

Bir neçə saniyəlik “xatirə” naminə tarixi və təbii irsə zərər vurmaq nə turist mədəniyyətinə, nə də milli dəyərlərə uyğun gəlir.

Şuşaya gedən hər bir şəxs bilməlidir ki, bura sadəcə gəzmək və şəkil çəkdirmək üçün məkan deyil. Şuşa Azərbaycanın tarixi yaddaşıdır. Bu şəhərdəki hər bir daşın, hər bir abidənin xüsusi mənəvi və tarixi əhəmiyyəti var.

Ən ağrılı məqam isə odur ki, bu torpaqların azadlığı uğrunda canından keçən şəhidlərimizin xatirəsi qarşısında belə məsuliyyətsiz davranışlara yol verilir.

Serhed.Az olaraq hesab edirik ki, Şuşanın tarixi və təbii irsinə zərər vuran hallara qarşı maarifləndirmə ilə yanaşı, qanunvericiliyin nəzərdə tutduğu tədbirlər də görülməlidir.

Şuşanı qorumaq yalnız aidiyyəti qurumların deyil, hər bir vətəndaşın borcudur.

Çünki bu şəhər bizə sadəcə miras qalmayıb — şəhidlərimizin canı bahasına əmanət edilib.