Bir neçə gün əvvəl Naxçıvan Muxtar Respublikasının Ordubad rayonunun Vənənd kəndində sahibkar Elxan Hacıyevə məxsus obyektin qarşısındakı ərazinin gecə saatlarında ağır texnikaların köməyi ilə dağıdılması, daha sonra isə kəndin icra nümayəndəsi Yaqut Babayevin həyat yoldaşının sahibkara təzyiq göstərməsi ilə bağlı məlumat vermişdik.

Məsələ ilə bağlı Ordubad Rayon İcra Hakimiyyətinin İctimaiyyətlə əlaqələr şöbəsindən bildirilib ki, qurum baş vermiş hadisədən məlumatlıdır.

Açıqlamada qeyd olunub ki, sözügedən ərazi sənədlər əsasında Elxan Hacıyevə məxsusdur. Hazırda məsələ ilə bağlı hüquq-mühafizə orqanları tərəfindən istintaq araşdırması aparıldığı üçün əlavə məlumatın verilməsi mümkün deyil.

Beləliklə, Ordubad Rayon İcra Hakimiyyəti də sözügedən ərazinin sənədlə sahibkar Elxan Hacıyevə məxsus olduğunu təsdiqləyib.

Qeyd edək ki, hadisənin bütün təfərrüatlarının, ərazinin gecə saatlarında hansı əsasla və kimin göstərişi ilə dağıdılmasının araşdırılması gözlənilir. Hüquq-mühafizə orqanlarının araşdırmasının nəticəsi məsələyə aydınlıq gətirəcək.