Ağcabədi rayon sakini Hüseynov Adışirin Sabir oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi haqsızlığa uğradığını bildirir:

“Mən, Hüseynov Adışirin Sabir oğlu, yazaraq bildirirəm ki, 10 ildir dializ xəsdəsiyəm, böyrəklərim işləmir. Bu səbəbdən də 1-ci qrup əlilliyim var.

Xeyli vaxt idi qolumdan dializ olunurdum. Qoluma qoyulan “fistal” xarab olduğu üçün, onu dəyişmək lazım gəldi. Özəl xəstəxanaya göndərdilər ki, yeni "fistal" qoyulsun. Həmin xəstəxanada pulsuz etmədilər ki, dövlət bizə onu pulsuz vermir. Məcbur qalıb, pulunu verdim, boyun nahiyəmdən qoydurdum.

1 ilə yaxındır ki, onunla dializ olunuram. Amma qolumda dəhşətli ağrılar səngimək bilmirdi. Bu səbəbdən göndərişlə “İstanbul NS” klinikasına yönləndirdilər. Orada həkim İlqar Hüseynovun qəbulunda oldum. "Anju" əməliyyatı olundum. Əməliyyat uğursuz oldu. Barmaqlarımı hərəkət etdirə bilmirəm. Ora qoyulan "fistal"ı da bərpa etmək əvəzinə, xarab etdilər.

Həkim İlqar Hüseynov "2 həftə sonra gəl" dedi. Həmin vaxt getdikdə isə qəbul etmədi. Bildirdi ki, "get, özünə başqa həkim tap, sənin əməliyyatını sığorta qalşılamır". Hətta bildirdi ki, mənim əməliyyatıma görə onun əmək haqqından 1900 manat pul tutulub. Bu səbəblə də bizi başqa həkimə yönləndirdi.

Hazırda boyun nahiyəmdən də dializ ola bilmirəm, vəziyyətim yaxşı deyil. Boynumdakının yerini dəyişib, qolumu yenidən əməliyyat etmək lazımdır. Ağcabədi Rayon Xəstəxanasından Bakı şəhərində yerləşən bir neçə xəstəxanaya sorğu göndərilib, lakin imtina cavabı verirlər.

“İstanbul NS” klinikasının həkimi İlqar Hüseynov məni səhv əməliyyat edib. Bu gün də onun fəsadını çəkirəm. Sizin sayt vasitəsilə Səhiyyə Nazirliyinə müraciət edirəm ki, biz xəstələrin öldürülməsinə və şikəst qalamsına imkan verməyin".

Jale FAMİLQIZI

Redaksiyadan: Yazıda adı qeyd olunan qurumların mövqeyini dərc etməyə hazırıq.