Tikintisi 20 ildən çox davam edən Böyük Misir Muzeyi (“Grand Egyptian Museum”) sabah, noyabrın 1-də qapılarını turistlərin üzünə açacaq.

“Gundelikxeber.org” “The Guardian”a istinadən xəbər verir ki, Giza Muzeyi kimi də tanınan nəhəng muzey dünyada bir sivilizasiyaya həsr olunmuş ən böyük arxeoloji obyekt hesab olunur.

1 milyard dollara başa gəlmiş muzey Giza piramidalarından təxminən 1 km məsafədə yerləşir və 470 min kvadratmetr sahəni əhatə edir. Tikintisinə 2005-ci ildə başlanılmış Böyük Misir Muzeyinin bəzi otaqları 2024-cü ilin payızında test rejimində açılıb.



Muzeydə 50 mindən çox eksponat, o cümlədən II Ramzesin 3200 yaşlı, 83 ton ağırlığında olan heykəli və piramidaların tikintisində iştirak etdiyi deyilən Firon Xeopsun 4500 il tarixi olan qayığı nümayiş olunacaq.
Kompleksə 24 min m² daimi ekspozisiya sahəsi, uşaq muzeyi, konfrans zalları, təhsil müəssisələri, ticarət zonası və böyük konservasiya mərkəzi daxildir.

Bir çox artefaktlar buraya Qahirədəki Misir Muzeyindən köçürülüb.

Muzeyin təntənəli açılış mərasimi bir neçə dəfə, o cümlədən sonuncu dəfə İsrail-HƏMAS münaqişəsi səbəbindən təxirə salınıb. Açılış mərasimində dünya liderlərinin və Misir Prezidenti Əbdül Fəttah əs-Sisinin iştirak edəcəyi gözlənilir.

Açılışdan əvvəl muzeylə yeni keçidlə birləşdirilən Giza piramidaları ətrafında atəşfəşanlıq olacaq.

Kompleksin daha çox turist cəlb etmək üçün metro tikintisi və hava limanının açılmasını da əhatə edən genişmiqyaslı infrastruktur layihəsinin tərkib hissəsi olduğu bildirilir.

Qeyd edək ki, rəsmi məlumatlara görə, 2024-cü ildə Misirə rekord sayda - 15,7 milyon nəfər turist səfər edib. Hökumət 2032-ci ilə qədər bu sayı iki dəfə artırmaq niyyətindədir.