İranda Atom Enerjisi Agentliyinin keçmiş əməkdaşı Mehdi Fərid İsrailə casusluq ittihamı ilə edam edilib.

“Gundelikxeber.org” xəbər verir ki, bu barədə “Mizan” xəbər agentliyi məlumat yayıb.

Bildirilib ki, Fərid İranın həssas qurumlarından birinin daxili şəbəkəsinə sızmağa cəhd etməkdə və İsrailin kəşfiyyat xidməti “Mossad”la əməkdaşlıq edərək məxfi məlumatları ötürməkdə ittiham olunurdu.

Əlavə edilib ki, o, Atom Enerjisi Agentliyinin strukturu, obyektlərinin yerləşməsi, təhlükəsizlik vəziyyəti və əməkdaşları barədə məlumatları qarşı tərəfə verib.

Məhkəmə orqanları təqsirləndirilən şəxsin ittihamları etiraf etdiyini iddia etsə də, insan haqları təşkilatları prosesin şəffaf aparılmadığını bildirir. Hüquq müdafiəçiləri Fəridin müstəqil vəkilə çıxışının məhdudlaşdırıldığını və etirafların təzyiq altında əldə olunmuş ola biləcəyini qeyd edirlər.

“Hengaw” İnsan Hüquqları Təşkilatı isə fərqli iddialar irəli sürür. Təşkilatın məlumatına görə, Fərid, əslində, İsrail adına fəaliyyət göstərən şəxslərin təkliflərini rədd edib və bu barədə İranın təhlükəsizlik orqanlarına məlumat verib. Hətta onun aldığı vəsait və məlumatları rəsmi qurumlara təqdim etdiyi bildirilir.

Buna baxmayaraq, Fərid əvvəlcə “məlumat sızdırmaq” ittihamı ilə 10 il həbs cəzasına məhkum edilib, daha sonra isə prokurorluğun apellyasiya şikayətindən sonra hökm dəyişdirilərək, ölüm cəzası ilə əvəz olunub.

Məlumata görə, istintaq zamanı Fərid təhlükəsizlik orqanları ilə əməkdaşlıq etdiyini dəfələrlə vurğulasa da, bu məqam məhkəmə tərəfindən nəzərə alınmayıb.

Qeyd edək ki, hüquq müdafiəçilərinin hesabatlarına əsasən, 2025-ci ildə İranda ən azı 1639 nəfər edam edilib ki, bu da son onilliklərdə ən yüksək göstəricilərdən biridir. Bu rəqəm əvvəlki illə müqayisədə əhəmiyyətli artım deməkdir.

Məlumata görə, son aylarda xüsusilə “Mossad”la əməkdaşlıq ittihamı ilə bir sıra şəxslər edam olunub. İran mediası həmçinin Tehranda etiraz aksiyaları və digər ittihamlarla əlaqədar daha bir neçə şəxsin edam edildiyini bildirib.

İran məhkəmə sisteminin rəhbərliyi isə ölkədə təhlükəsizlik vəziyyətini “tam müharibə şəraiti” kimi qiymətləndirərək, bu kateqoriyadan olan işlər üzrə cəzaların sərtləşdirilməsinə çağırış edib.