ABŞ-də triatlonçu məşq zamanı timsahın hücumuna məruz qalıb.

O, nəhəng yırtıcının hücumundan gözünü sıxaraq xilas olmağı bacarıb.

Hadisə Corciya və Cənubi Karolina ştatlarının sərhədində yerləşən Savannah çayında baş verib. Qarşıdakı “Ironman” yarışına hazırlaşan triatlonçu və məşqçi Conatan Bruni məşq üçün idmançı qrupunu çaya aparıb.

Bruni əvvəlcə məşqi sakit tempdə, aşağı ürək döyüntüsü ilə keçirməyi planlaşdırıb. Üzgüçülük zamanı sağ dirsəyinə qəfil toxunuş hiss edib. İlk anda bunun çayda üzən ağac parçası olduğunu düşünüb.

Lakin sağ tərəfinə baxdıqda bunun nəhəng timsah olduğunu görüb. Bruni bildirib ki, heyvanın böyüklüyünü gördükdən sonra onun bir hərəkətlə qolunu yaralaya və ya qopara biləcəyini düşünüb.
Timsahın hücumundan qurtulmaq üçün Bruni televiziya proqramlarından xatırladığı bir üsuldan istifadə edib. Əvvəlcə heyvana iki dəfə yumruqla zərbə endirsə də, bunun heç bir təsiri olmayıb. Daha sonra əli ilə timsahın burnuna doğru uzanaraq onun gözünü sıxıb.

Bu hərəkət nəticəsində triatlonçu sudan uzaqlaşaraq digər idmançılarla birlikdə təhlükəsiz yerə çıxa bilib.

Hadisə zamanı qrupdakı digər idmançılardan heç biri timsahın hücumuna məruz qalmayıb. Üzgüçülərin üzərində telefon olmadığı üçün hadisəni görən bir şəxs 911-ə zəng edib.
Bruninin dostlarından biri isə üzgüçülük şamandırasının ipindən istifadə edərək onun qanayan qolunu sarıyıb. İlk yardım göstərilən zaman idmançı başgicəllənməsi və qolunda soyuqluq hiss etdiyini bildirib.

Bir neçə dəqiqə sonra hadisə yerinə polis əməkdaşları və təcili tibbi yardım briqadası gəlib. Polis əməkdaşları onun qoluna ilkin sarğı qoyub və daha sonra Bruni xəstəxanaya aparılıb.
Triatlonçu hadisədən sonra yarışda iştirakına icazə verildiyini bildirib. O, yaşadığı dəhşətli hadisəyə baxmayaraq, yenidən həmin sularda üzməkdən çəkinməyəcəyini deyib.