Hazırda oxunan: Qərb Ukraynada müharibənin bitməsini istəmir: Rusiyanın cavab həmləsi...
Xəbər verdiyimiz kimi, Ukrayna ordusu Donetsk şəhərinə raket zərbələri endirib. Hücum nəticəsində azı 27 nəfər ölüb. Bundan əlavə, Ukraynanın son dövrlərdə Rusiya ərazisindəki strateji obyektlərə də hücumları artıb.

Maraqlıdır, Rusiyanın intiqam həmləsindən sonra gedişat necə olacaq?

Politoloq Tofiq Abbasov mövzu ilə bağlı Bizim.Media-ya danışıb. O qeyd edib ki, müharibə gedə-gedə tərəflər cəbhəxanalarını zəngiləşdirməklə məşğuldular:

“Biz görürük ki, zərbələr gücünü yavaş-yavaş artırır. Mülki əhali sıralarında itkilərin də sayı artıb. Burada əsas səbəbi Qərbin canfəşanlığında görürəm. Qərbin məqsədi iki slavyan ölkəsi arasında uzunmüddətli müharibə olmasını təmin etməkdir. Avropa İttifaqında slavyan ölkələrindən olan təmsilçilər bunu təsdiqləyirlər. Qərb institutları, dairələri bu müharibənin uzanması üçün bütün variantlara əl atacaqlar.

Rusiyada buna “xüsusi hərbi əməliyyat”, Ukraynada isə “müharibə” deyirlər. Bu, əslində müharibədir. Fevral ayının 24-də iki il tamam olacaq, belə uzun sürən hərbi əməliyyat sözün əsl mənasında müharibə anlamına gəlir.

Təbii ki, Donetskdə mülki insanların ölümü ilə bağlı Rusiyanın da cavabı olacaq. Amma mən bu müharibənin artıq bir mənasını görmürəm.

Həm Rusiya, həm də Ukrayna daxilində müharibədən uzaq duran qüvvələr deyirlər ki, gəlin, dayanaq, atəşkəs elan edək və danışaq. Mənə elə gəlir ki, xarici qüvvələrin müdaxiləsi buna imkan verməyəcək”.