İcra başçısı Alı Alıyev və nazir Məcnun Məmmədov bu şəxsin fəaliyyətini mütləq araşdırmalıdır.
Kənd təsərrüfatı Azərbaycanın sosial-iqtisadi həyatında xüsusi əhəmiyyət kəsb edir. Qeyri-neft sektorunun prioritet sahələrindən olan kənd təsərrüfatı məhsullarının istehsalı və emalı sektoru ötən dövr ərzində iqtisadiyyatın əsas sektorlarından biri kimi müəyyənləşdirilib və görülmüş məqsədyönlü tədbirlər nəticəsində bu sahənin inkişafı üçün əlverişli şərait yaradılıb.
Kənd təsərrüfatının ənənəvi sahələrinin sürətli inkişafı, kənd təsərrüfatı məhsullarına tələbatın ödənilməsi, emal müəssisələrinin xammal təminatının yaxşılaşdırılması və emal sənayesinin genişlənməsi istiqamətində dövlət dəstəyinin gücləndirilməsi ilə əlaqədar bir sıra hüquqi aktlar, o cümlədən dövlət proqramları qəbul edilib. Eləcə də, ölkənin ixrac potensialının yüksəldilməsi, kənd təsərrüfatı məhsullarının istehsalı və emalı sahəsində fəaliyyət göstərən kiçik və orta sahibkarların innovativ qabiliyyətlərinin artırılması, yüksək məhsuldarlığın əldə olunması, kənd təsərrüfatı məhsullarının istehsalı və emalı prosesində intensiv metodların geniş tətbiqində istehsalçı, emalçı və istehlakçı arasında inteqrasiyanın formalaşmasında önəmli rolu olan aqroparkların yaradılması istiqamətində mühüm addımlar atılıb. Görülən tədbirlər isə aqrar sahənin inkişafında xüsusi rol oynayıb.
Bu sahədə nə qədər inkişaf müşahidə edilsə də, bəzi nöqsanlar təəssüf ki, hələ də mövcudluğunu qoruyub saxlayır. Etiraf etmək lazımdır ki, Məcnun Məmmədov kənd təsərrüfatı naziri təyin edildikdən sonra bu sahədə dinamik inkişaf açıq şəkildə nəzərə çarpır. Lakin yerlərdə bəzi məsul şəxslər cənab nazirin həyata keçirdiyi mütərəqqi islahatlara kölgə salmaqla məşğuldur.
Xalq bildirir ki, bu barədə Leqal.info saytına Kənd Təsərrüfatı Nazirliyinin Füzuli rayon Kənd Təsərrüfatı İdarəsinin rəhbər şəxsləri, daha dəqiq desək Xanlarov Orxan Ziyad oğlunun törətdiyi qanuna zidd əməllər barədə sensasion faktlar daxil olub. Bu barədə redaksiyamıza məlumat verən Füzuli rayon sakini, fermer Novruzov Ruslan Əsəd oğlu bildirib ki, Orxan Xanlarov əlində olan səlahiyyətlərdən sui-istifadə etməklə vətəndaşların haqqını tapdalayır: “Bu adam mənim şəxsi təsərrüfatımda çoban işləyən Səfiyarlı Fərhad Qubad oğlu və bibisi oğlu İntiqam Həsənovla (hazırda şərti olaraq azadlıqdadır- R.N) birlikdə mənim çobanımı ələ alaraq təsərrüfatımdan 50 baş ana qoyun, 70 baş çəpiş (ana keçi) və 100 baş yeni doğulan quzumu mənim fermamdan oğurlayıb özəlləşdiriblər. Baş vermis hadisə ilə bağlı bütün sbutları və şikayətimi Füzuli Rayon Polis Şöbəsinə etmişəm. Orxan Xanlarov etdiyi qanunsuz əməllərlə kifayətlənməyərək Füzuli Rayon Polis Şöbəsinə müraciət etdiyim üçün mənə hədə qorxu gəlməyə başlayıb. O və bibisi oğlu İntiqam Həsənov mənə və atama hədə-qorxu gəlir. Mənə deyir ki, şikayətini geri götürmədiyin halda sənə məxsus torpaq sahələrinə şəhid ailəsi yerləşdirib əlindən alacağam. Bu işdə bu adama idarənin rəisi Novruz müəllim köməklik edir. Mən sizin vasitənizlə əlaqədər dövlət qurumlarından kömək istəyirəm. Xahiş edirəm ki, mənə dəymiş ziyana görə günahı olan şəxslər cinayət məsuliyyətinə cəlb olunsunlar”.
Məsələ ilə bağlı yazıda adı qeyd olunan şəxslərin mövqeyini öyrənməyə çalışsaq da, cəhdlərimiz uğursuz alındı. İnanırıq ki, Füzuli Rayon İcra Hakimiyyətinin başçısı cənab Alı Alıyev və kənd təsərrüfatı naziri hörmətli Məcnun Məmmədov Orxan Xanlarovun fəaliyyətini dərindən araşdırıb onun özbaşına əməllərinə son verəcəklər.(Xalq)